රාවණා රජ

විකිපීඩියා, නිදහස් විශ්වකෝෂය වෙතින්
Jump to navigation Jump to search

රාවණ (IAST : Rāvaṇa; / ˈrɑːvənə/ ; සංස්කෘත දී : रावण) යනු පුරාණ ලංකා පුරාවෘතයන් හි සදහන් වන බලසම්පන්න රජ කෙනෙකි. දසිස් රාවණ, විසැස් රාවණ ලෙසද හදුන්වනු ලබන මෙතුමා වඩා ප්‍රසිද්ධ වූයේ ඍෂි වාල්මිකී විසින් රචිත ඉපැරණි ඉන්දීය මහා කාව්‍යයක් වන රාමායණයෙහි ඇති ප්‍රධාන දුෂ්ට චරිතය ලෙසය. එයට අනුව සිය සොයුරියට කළ නිගරුවකට පළිගනීමක් ලෙස රාමගේ බිරිද වන සීතා ව පැහැරගෙන එන රාවණ ව වදුරු හමුදාවක් සමගින් එන රාම විසින් රාවණගේ සොයුරකු වන විභීෂණගේ සහයත් ලබාගනිමින් සටන් කර මරා දමනු ලැබේ. කෙසේ වෙතත් පුරාවෘත්තවලට අනුව රාවණ රජු ධෛර්යසම්පන්න, දක්ෂ පාලකයෙකු වන අතරම දේශීය ආර්යුවේද වෛද්‍ය ශිල්පයේ ද හා නිර්මාණකරණයෙහි ද පුරෝගාමියෙකු ලෙසද ප්‍රකට ය. එමෙන්ම අතිදක්ෂ වීණා වාදකයෙක් බවත් කියැවේ. පුෂ්පක විමානය සහ දඬුමොණරය යානය ඔහුගේ නිපැයුම් ලෙස සැලකේ. තවද ආර්යුවේද වෛද්‍ය ශාස්ත්‍රය සම්බන්ධව 'අර්ක ශාස්ත්‍රය' හා තාරකා විද්‍යාව පිළිබඳව 'රාවණ සංහිත' කෘතීන් ද රාවණ රජු විසින් රචනා කරන ලදැ යි කියැවේ. ලාංකීය ඉපැරණි සටන් කලාවක් වන අංගම් සටන් ශාස්ත්‍රය හි වැඩිදියුණු කිරීම් සදහාද ඔහු විශේෂ දායකත්වයක් ලබාදුන් බව ජනප්‍රවාද වල සදහන් වේ. රාවණගේ පුරාණ අංගම් හා මුෂ්ඨි ශාස්ත්‍රය නමැති අප්‍රකට පුස්කොළ ග්‍රන්ථය මීට නිදසුනක් වේ. [1] රාවණ රජු දුෂ්ටයෙකු ලෙස රාමායණය ඇතුලු බොහෝ තැන් වලදී හදුන්වා දුන්න ද රාවණ විශ්වාසය පවතින වෙනත් රටවල පවතින්නේ ඊට වෙනස් වූ ගෞරවණීය හැගීමකි. එසේම ඉන්දියාවේ ප්‍රදේශ කීපයක මෙන්ම බාලි දූපත් වල (වර්තමාන ඉන්දුනීසියාව) ද රාවණ රජු ඇදහීම සිදුවේ. රාවණ, ශිව දෙවියන්ගේ විශේෂ අනුගාමිකයෙක් ලෙසට විශ්වාසයක් පවතී.කෙසේ වෙතත් 'ලංකාවතාර සූත්‍රය' නම් මහායාන බෞද්ධ කතා වස්තුවට අනුව රාවණ රජු බුදුදුහම කෙරෙහි ද නැඹුරුවක් පැවැති බවත් සදහන් වේ. මහායාන ධර්මයේ සාරය ගැබ්කරගත් සූත්‍රයන් වන ලංකාවතාර සූත්‍රය මෙන් ම ප්‍රඥ්ඥාපාරමිතා සූත්‍රය ද බුදුන් විසින් දේශනා කළ බව පැවසෙන්නේ වසර 500කට පෙර මියගිය රාවණා යළි කැදවා ශ්‍රී පාද කදුමුදුනෙහි දී ය. ඒ එය අවබෝධ කරගන්නට සමත් අයෙක් මිහිපිට නැති බැව් උන්වහන්සේ දුටු හෙයිනැ යි උක්ත සූත්‍රයන් හි දැක්වේ.

රාමායණය[සංස්කරණය]

රාමායණයට අනුව රාවණ යනු හිස් දහයක් සහ අත් විස්සක් ඇති බලසම්පන්න රජ කෙනෙකි. රාවණ ඇතුලු ලංකාවාසී රාක්ෂසයන් මිනිසුන් බුදින ගුප්ත ශක්ති සහිත අමනුෂ්‍ය කොට්ඨාශයක් වශයෙන් එහි නිරූපණය කර ඇත. එමෙන් ම ගුප්ත හැකියාවන් සහිත වූත් ශිව, බ්‍රහ්මන් වැනි දෙවිවරුන් සමග ගැටුණු සහ හිරු සදු පවා මෙහෙයවිය හැකි අයකු ලෙස නිරූපණය කර තිබේ. රාමායණයට අනුව රාම සිය බිරිද වන සීතා සහ සොහොයුරු වන ලක්ෂ්මණ සමග වනගත ව සිටින අතරක සූර්පණකා නම් රාවණගේ නැගණිය සීතාට හිරිහැර කරයි. එවිට ලක්ෂ්මණ ඇයගේ ක්න, නාසා සහ තන් කඩුවෙන් කපා දමයි. සූර්පණකා රාවණ හමුවට ගොස් තමාට සිදුකළ දෙය ගැන පවසයි. එහි දී ඇය සීතා ගැන කරන විස්තරය අසන රාවණ ඇගේ සුන්දරත්වයෙන් වශී වේ. ඇය සිය මෙහෙසියක කරගැනීමේ අදහසින් සිය දඩුමොණරයෙන් යන ඔහු රාමා සහ ලක්ෂ්මණ උපක්‍රමයෙන් බැහැරට යවා තවුස් වෙසකින් සීතා හමුවට පැමිණ සිය දඩුමොණරයට නංවාගෙන එයි. ඇය ව අශෝක වනයේ සිර කර තබයි. සීතා ගෙනගිය මග සොයා ගන්නා රාම ස්‍රග්‍රීව නම් වානර නායකයාගේ සහායෙන් හනුමන්තා ඇතුලු වානර සේනාවක් රැගෙන විත් රාවණ සමග සටන් වදී. රාවණ සමග ගැටුමක් ඇතිකරගන්නා ඔහුගේ සොහොයුරකු වන විභීෂණ රාජ්‍යයට හතුරු වී රාම සමග එක්වෙයි. ඊට කලගුණ සැලකීමක් වශයෙන් රාම රාවණගේ මරණින් පසු ඔහු ව ලංකාවේ රජු ලෙස පත්කරයි. රාමායණයේ පූර්ව ජවනිකාවකට අනුව සීතා ව පාවාගනු පිණිස සැපිරිය අභියෝගයක් වශයෙන් ඇගේ පියා සතු ශිව විසින් දෙනු ලැබූ ඉතා බර දුන්නක් බිද දැමිය යුතු වේ. අභියෝගය භාරගැනීමට පැමිණෙන රජවරු අතර රාවණ හා රාමා ද වෙති. කිසිදු මිනිසෙක් එය සෙලවීමටවත් අසමත් වන අතර රාවණ එසවීමට සමත් වුවත් බිද දැමීමට අසමත් වේ. රාමා එය පහසුවෙන් ම බිද දමයි. ඒ අනුව සීතා ඔහුට හිමි වේ.

සබැදුණු විශ්වාස[සංස්කරණය]

රාවණා හා බැදුණු විවිධ පුරාවෘත සහ ඉපැරණි හින්දු ආගමික ග්‍රන්ථයන්හි එන සදහන් රැසක් ඇති මුත් මේ සියල්ල එකසමාන නැත. ඔහු ජීවත් වූ බවට සැලකෙන කාලය, ජීවත් වූ ප්‍රදේශය සහ ස්ථානය, ශාරීරික ලක්ෂණ, ඥාතීන් , රාම-රාවණ යුද්ධයට හේතුව, සහ තවත් වෙනත් සිද්ධි පිළිබද විවිධ අර්ථනිරූපණ හා විශ්වාස ඇත. සිංහලේ (ශ්‍රී ලංකාවේ) රාජාවලියේ එන "මනු" රාජවංශය අවසාන වූවායින් පසුව, තවත් රාජ වංශ 03ක් ගැන ඉතිහාසයේ සඳහන් වේ. ඒවානම් තාරකා[වසර 10,000 කට පෙර], මහබලි[වසර 7,500කට පෙර], රාවණ [වසර 5,000- කට පෙර] යන ඒවාය. [තහවුරු කරන්න] "වරිගපූර්නිකාව"නම් යක්ඛ ජනතාවට අයත් පුස්කොල පොතේ "ශ්‍රී රාවණ" අධිරාජයාගේ නාමය සඳහන් වන්නේ "කෞරාන මන්ඨක" ලෙසයි. එනම් "සියල්ල සම්පූර්ණ කල යකා" ලෙසයි. රාවණා යනු මහා ප්‍රාඥයෙක්, දක්ෂ පාලකයෙක්, අතිදක්ෂ ආයුර්වේද වෛද්‍යවරයෙක් හා සුප්‍රසිද්ධ විණා වාදකයෙකු වශයෙන් පෙන්වා දී ඇත. [තහවුරු කරන්න] දසිස් රාවණ (හිස් දහයක් ඇති) ලෙස ඇතැම් තැනෙක සඳහන් වන රාවණ මනා සේ ශිල්ප ප්‍රගුණ කල, අමරණීයත්වයට වරම් ලැබීම සඳහා භාවනා යෝගීව මනස දියුණු කරගත් අධිරාජයෙකු බවත් හෙළ රාජධානියෙන් එපිට රටවල් පවා පාලනය කළ බවත් සඳහන් ය. රාවණ නමින් හැදින්වෙන්නේ අතීතයේ රජකළ බවට ජනප්‍රවාදයේ එන මනුගෙන් පටන් දශානත් රාවණ දක්වා වූ රක්ෂස රජවරුන් භාවිතා කළ අභිදානයකි. [තහවුරු කරන්න]ආචාර්ය සූරිය ගුණසේකරට අනුව සූර්ය වංශය යනු එහි අරුත යි. රා, රේ යනු සූර්යාට කියන අපර නාමයන් බවත්, වන යනු වංශය, බබලවන්නා යන අරුත් බවත් හෙතෙම පවසයි. [තහවුරු කරන්න] වෛශ්‍රවන යන්නද ඇතැම් රක්ෂස රජවරුන් භාවිතා කළ අභිනාමයකි. පරාක්‍රමබාහු, විජයබාහු යන නම් රජවරු කිහිප දෙනෙක්ම යොදාගෙන ඇත්තාක් මෙන් රාවණ යන්නද කිප දෙනෙක්ම යොදා ගත් බව සමහරු පවසති. නිතර කියැවෙන දශානත් රාවණ යනු ඉන් එක් අයෙක් පමණකි යනු ඔවුන්ගේ මතය යි. [තහවුරු කරන්න] පුෂ්පිකය හෙවත් දඬුමොණරය යනු රාවණා ගේ නිල රථය ලෙස සැලකේ. මෙය ගුවන් යානාවක් ලෙස නිරූපණය කර තිබේ. සූර්ය බලය හා දියමන්තියක් ආධාරයෙන් රසදිය උණුසුමට ලක් කිරීම තුලින් යානාවට ගුවන් ගතවීම උදෙසා බලය ලබාගෙන ඇති බව සඳහන් වේ. [තහවුරු කරන්න] පුරාවෘතවලට අනුව පුෂ්පිකය මෙන් ම ලංකාපුරය ද මුලින් ම අයත් වී ඇත්තේ රාවණගේ සොහොයුරකු වන කුවේරට ය. රාවණ ඔහු ව පරාද කර ලංකාපුරයත් දඩුමොණරයත් අත්කර ගනී. කුවේර හෙවත් වෙසමුණි ඉන්දියාවට පැන යයි.[2] රාවණගේ හිස් දහය ඔහුට යටත් වූ ප්‍රදේශයන් දහයක් ලෙස ද අර්ථදක්වා තිබේ. [තහවුරු කරන්න]

දස රාවණ සංකල්පය[සංස්කරණය]

01. රාජාධි රාවණ (රටවල් කිහිපයක් පාලනය කල නිසා) 02. විරු රාවණ (අධික වීරත්වයක් ඇති නිසා) 03. තිර රාවණ 04. රණ රාවණ 05. සිරි රාවණ 06. තරු රාවණ 07. පුත් රාවණ 08. මනු රාවණ 09. දික් රාවණ 10. රාජාව රාවණ දසිස් රාවණ හෙවත් හිස් දහයක් සහිත රාවණ නමින් රාවණ අධිරාජයා ඇමතීම සඳහා ඉහත දස රාවණ සංකල්පයද යම් බලපෑමක් සිදුකරන්නට ඇතැයි විශ්වාස කල හැකිය. රාවණගේ හිස් දහය ඔහුට යටත් වූ ප්‍රදේශයන් දහයක් ලෙස ද අර්ථදක්වා තිබේ. [තහවුරු කරන්න]

රාවණ නම් වූ වෛද්‍යවරයා[සංස්කරණය]

ඇතැම් පෞරාණික ග්‍රන්ථ රාවණ විසින් රචිත බවට සැලකේ. ඒ අතර පහත දැක්වෙන ආයුර්වේද ග්‍රන්ථ ද වේ. 01. කුමාර තන්ත්‍රය (ලාදුරු ඇතුළු නොයෙක් රෝගයන්ට අවශ්‍ය බලවත් රෝග දහසක් සඳහා බෙහෙත් ඇතුලත්ය) 02. උද්දිසා තන්ත්‍රය (මෝහන ප්‍රතිකාර හා ගුප්ත විද්‍යා ප්‍රතිකාර) 03. නාඩි ප්‍රකාශය (නාඩි ශාස්ත්‍රය ඇසුරෙන් වන ප්‍රතිකාර) 04. අර්ක ප්‍රකාශය 05. රසරත්නාකාරය 06. වට්කා ප්‍රකරණය ඉහත "අර්ක ප්‍රකාශය" අවසන් වන්නේ "ලංකාධිපති රාවණ විසින් ප්‍රබන්ධ කරන ලද සර්ග සීයක් මෙසේ අවසන් වෙයි" ලෙසයි. එමෙන්ම රාවණ ගේ ප්‍රධානත්වයෙන් හිමාලයේ ආයුර්වේද සම්මන්ත්‍රණයක් පවත්වන ලද බවත්, ඔහු එහි වෛද්‍ය මණ්ඩලය හි ප්‍රධානියා වශයෙන් ද පත්ව සිටිබව සඳහන් වේ. [තහවුරු කරන්න]

සංස්කෘතික බලපෑම[සංස්කරණය]

එසේම ඉන්දියාවේ ප්‍රදේශ කීපයක මෙන්ම බාලි දූපත් වල (වර්තමාන ඉන්දුනීසියාව) ද රාවණ රජු ඇදහීම සිදුවේ. ඉන්දියාවේ "දුස්රා" නමින් රාවණ සමඟ පැවති යුද්ධයේ රාම ගේ ජයග්‍රහණය සැමරීමට කටයුතු කරනු ලබයි. බාලි දූපත් ආශ්‍රිතව රාවණ උදෙසා පුද පූජා පවත්වනු ලැබේ.

රාජධානිය[සංස්කරණය]

අග නුවර - ලංකාපුර, අලකමංඳාව, තපො වනය, ගොකණ්ණක,

විවාදය[සංස්කරණය]

රාවණා පිළිබද විවිධ අදහස්, කොතෙක් මත දැක්වීම්, විශ්වාස, ජනප්‍රවාද පැවතුණත් ශ්‍රී ලංකාවේ රාවණා යනුවෙන් පාලකයකු සිටි බවට පුරාවිද්‍යාත්මක හෝ ඉපැරණි සාහිත්‍යයික මූලාශ්‍රවලින් තහවුරු වී නොමැත. කෙසේනමුත් කුමාරතුංග මුනිදාස, අරිසෙන් අහුබුදු වැනි වියතුන් ද ආචාර්ය මිරැන්ඩෝ ඔබේසේකර, ආචාර්ය සූරිය ගුණසේකර වැනි ඉතිහාසඥයන් ද ආරියදාස සෙනෙවිරත්න, ජයරත්න පතිරආරච්චි වැනි ස්වාධීන ගවේෂකයන් ද, මානෑවේ විමලරතන හිමි ද මෙය සත්‍යයක් බවට කරුණු දක්වා ඇත. කෙසේනමුත් මේ මත ඉතිහාස සහ පුරාවිද්‍යා ක්ශේත්‍රයේ අති බහුතරයක් වියතුන් වෙතින් ප්‍රතික්ෂේප වී ඇති අතර ජනතාව නොමග යවන සාවද්‍ය අර්ථනිරූපණයන් බවට විවේචනයට ද ලක් වී තිබේ.[3] [තහවුරු කරන්න]මේ ඇතැම් වියතුන් දක්වා ඇති මතවල ඇති විසුළුසහගත ස්වභාවය ද මේ විවේචනවලට හේතු වී ඇත. නිදසුන් ලෙස ආචාර්ය මිරැන්ඩෝ ඔබේසේකර මහතා වරක් පැවසුවේ රාවණ රජු මියගොස් නැති බවත් ඔහු සිටින්නේ සිහිමූර්ඡා වී බවත් ය. [තහවුරු කරන්න] පසුව පුවත්පතකට රාවණ සම්බන්ධ ව ලිපි පෙළක් සපයන ඔහු රාවණ රජු තමන්ට සිහිනෙන් පෙනී සිට එම තොරතුරු දැනුම් දුන් බව පුවත්පත් සංවාදයක දී පවසා සිටියේ ය. [තහවුරු කරන්න] රවිශෛලාශ වංශකතාව යනුවෙන් රාවණ පෙළපත පිළිබද ව සහ යක්ෂ ගෝත්‍රික අක්ෂර සංකේතාදිය ගැනත් යනුවෙන් ශාස්ත්‍රීය ග්‍රන්ථ දෙකක් පළ කළ මානෑවේ විමලරතන හිමි පවසා සිටින්නේ තමන්වහන්සේ රාවණා අයත් රවි ශෛලාශ වංශයෙන් පැවත එන බවකි. [තහවුරු කරන්න]

ශ්‍රී ලංකාවේ ඉතිහාසය අඛණ්ඩ ව වාර්තා කරන මූලාශ්‍රය වන මහාවංශයේ රාවණා යනුවෙන් පාලකයකු සිටි බවට කිසිදු සදහනක් නැත. එයට අනුව ලංකාව ජනාවාස වන්නේ ද්ධ පරින්ර්වාණ දිනයේ ම සිදුවන විජය ඇතුපු සත්සියයක පිරිසකගෙනි. කෙසේනමුත් ඊට පෙර ලංකාව යක්ෂ, නාග වැනි පිරිස් විසින් ජනාවාස වී තිබුණු බව මහාවංශයෙන් ම පැහැදිලි වේ. එහෙත් එහි ඔවුන් නිරූපණය කර ඇත්තේ ගෝත්‍රික පිරිස් ලෙස නොව සියුම් ශරීඍ ඇති අමනුෂ්‍ය කණ්ඩායම් වශයෙනි. එසේම එවැනි තවත් පැරණි ඉතිහාස ග්‍රන්ථ වන දීපවංශය, සිංහල බෝධිවංශය, ථූපවංශය, දාඨාවංශය, වංසත්ථපකාසිනිය (මහාවංශ ටීකාව), සමන්ත පාසාදිකාව වැනි ග්‍රන්ථවල ද රාවණා රජු හෝ එවැනි පෙළපතක් ගැන කිසිදු සදහනක් නැත.

කෙසේනමුත් රාවණ යනුවෙන් පාලකයෙක් සිටි බවට අදහස් දක්වන අය පෙන්වා දෙන්නේ ලංකාවේ සත්‍ය ඉතිහාසය පාලි වංශකථාකරුවන් විසින් මෙන් ම පසුව ලංකාවේ ඉතිහාසය ලියූ ඉංග්‍රීසි ජාතිකයන් ද විසින් යටපත් කර ඇති බව යි. මොවුන්ගේ ග්‍රන්ථ අධිකාරී ලෙස පිළිගැනීමත් මහාවංශ ඉතිහාසයට වහල් වීමත් නිසා ලංකාවේ ආර්ය පූර්ව ශිෂ්ටාචාරය පිළිබද තොරතුරු සැගවී පවතින බවත් ඔවුන්ගේ අදහසයි. [4]

ලංකාවේ රාවණ රජු හා රාමායණයේ එන වෙනත් චරිත හා සබැදි නම් ඇති ස්ථාන රැසක් හදුනා ගත හැකි ය. එමෙන් ම එම නම් පැමිණි අයුරු කියවෙන රාමායන පුවත හා බැදි ජනප්‍රවාද ද පවතී. මේ ස්ථාන නාමයන් මෙලෙස පැමිණීමට හේතුව එම ස්ථාන සත්‍ය වශයෙන් ම එම චරිත හා සිද්ධි සමග බැදී තිබීම විය යුතු බවට සමහරු අදහස් දක්වති. නමුත් හෑගොඩ විපස්සී හිමියන් පෙන්වා දෙන්නේ මේ බොහෝ ග්‍රාම නාම පසුකාලීනව බිහි වූ ඒවා විය හැකි බවයි.[3]

එමෙන් ම "වරිගපූර්නිකාව"නම් යක්ෂ ජනතාවට අයත් මුඛපරම්පරාගත ග්‍රන්ථයේ රාවණා සහ ඔහුගේ වංශය සම්බන්ධ තොරතුරු දැක්වෙන බව ආචාර්ය මිරැන්ඩෝ ඔබේසේකර සහ මානෑවේ විමලරතන හිමි වැනි අය පවසති. [තහවුරු කරන්න] තවම සොයා පළ කර නැති මේ ග්‍රන්ථය තමන් සතු ව ඇති බව ඔවුන් පවසන නමුත් ඔවුන් එය මෙතෙක් ප්‍රකාශයට පත් කර නොමැත.

ලංකාවට අයත් ව තිබී ගිලී ගිය පෙදෙසෙක රාවණා ලංකාවට අයත් නටබුන් පිහිටා තිබිය යුතු බවට ද සමහරු මත පළකරති. එහෙත් නාගොඩ ආරියදාස සෙනෙවිරත්න පෙන්වා දෙන්නේ රාවණ සිටි බව සැලකෙන ලංකාපුරය යනු වත්මන් සීගිරිය බව යි. සිංහල බෝධිවංශයේ ලංකාපුරය පිහිටියේ යැයි පැවසෙන මැළෑඩුර ග්‍රාම නාමය විග්‍රහ කරමින් එය මාතලේ දිස්ත්‍රික්කයේ පිහිටිය යුතු බව [5]පවසන ඔහු එහි පිහිටි එකම ගිරි බලකොටුව වන සීගිරිය යනු ලංකාපුරය බව පවසයි. රාමායණයේ හනුමාගේ ගමන් විස්තරයේ දී හමුවන ත්‍රිකූට ගිරි යන්න බිදීමෙන් තිරිකුණාමලය බිහි ව ඇති බවත් සිංහල භාෂාව ඇසුරින් පෙන්වන [6]ඔහු පවසන පරිදි රාමායණයේ හනුමාගේ ලංකාපුර වැණුම තුළ ගිරි මුදුන, සිතුවම්, වැනි නූතන සීගිරියේ බොහෝ ලක්ෂණවලට තුල්‍ය වෙයි. [7]

බැබිලෝනියානු ශිෂ්ඨාචාරය "ගුවන්යානා වලින් පැමිණි සිංහ මිනිසුන් ගේ උපදෙස් මත ගොඩ නගන ලද බව" 1998 වසරේ සොයාගත් මැටි පුවරුවකින් කියැවෙන්නේ යැයි ආචාර්ය සූරිය ගුණසේකර මහතා පවසයි. "බැබිලෝනියානු එල්ලෙන උයන හෙළයේ සිහගිරිය (සීගිරිය) ඉදිකළ තාක්ෂණය හා උපදෙස් අනූව ඉදිකළ බවත් එහි සඳහන් වී ඇතැ" යි ඒ මහතා තවදුරටත් පවසයි.

රාවණා සංකල්පය හෙල සංකල්පය සමග ද දැඩි ව බැදී පවතී. ලංකාවේ ආදී මනුෂ්‍යයන් යක්ෂ, නාග, රාක්ෂහ සහ දේව වශයෙන් ගෝත්‍ර ලෙස බෙදී සිටි බවත් ඔවුන් හෙළයන් වශයෙන් හැදින්වුණු බවත් වත්මන් සිංහලයන්ගේ පරපුර එම හෙළයන් බවත් ඉපැරණි හෙළ අධිරාජ්‍යය ලෝකය පුරා ව්‍යාප්ත ව පැවති බවත් සමහරු පවසති. මහාවංශය වැනි ඉතිහාස ග්‍රන්ථයන් හි මෙන් ම ඇතැම් බෞද්ධ සූත්‍රයන් හි ද සදහන් වන යක්ෂ, නාග වැනි කණ්ඩායම් ගැන සදහන් මේ සදහා සාක්ෂියක් ලෙස ඔවුහු දක්වති. කුමාරතුංග මුනිදාසයන් විසින් හදුන්වා දුන් හෙළ සංකල්පය අරිසෙන් අහුබුදු වැනි හෙල හවුලේ වියතුන් විසින් ද තවදුරටත් විදාරණය කරන ලදී. සිංහල භෂාවේ ඇති පාලි හෝ සංස්කෘතියේ නොමැති හෝ ඉන් බිදී නොපැමිණි වදන් නිදසුන් ලෙස දක්වමින් ඔවුන් කියා සිටියේ හෙළ බසක් පැවති බව යි. මාතර දිස්ත්‍රික් එජාප පාර්ලිමේන්තු මන්ත්‍රී බුද්ධික පතිරණ විසින් රාවණා රජුගේ ඉතිහාසය ගවේෂණය කිරීමට විද්වත් කමිටුවක් පත්කිරීම සඳහා පාර්ලිමේන්තුවට පෞද්ගලික මන්ත්‍රී යෝජනාවක් 2015ඔක්තෝම්බර් මස දී ඉදිරිපත් කරන ලදී.[3]

රාවණ
සිවු හෙලේ රජ

Ravana British Museum.jpg
රාජ්‍ය සමය ක්‍රි:පූ 2554 - ක්‍රි:පූ 2517
පූර්වප්‍රාප්තිකයා කුවේර රජ..වෛශ්‍රවණ
අනුප්‍රාප්තිකයා විභීෂණ රජ
වල්ලභයා මන්දෝදරී
දරුවන් ඉන්ද්‍රජිත් (මේඝනාධ)

ත්‍රෛශීර්ෂ අථිකාය අක්ෂයකුමාර නරන්ථක දේවාන්ථක ප්‍රහෂ්ඨ සොහෙළි (සීතා)

පියා විශ්‍රාවාස මුණි
මව පුෂ්පෝත්කථා

පෙලපත[සංස්කරණය]

රචිත ග්‍රන්ථ[සංස්කරණය]

රාජධානිය[සංස්කරණය]

අග නුවර - ලංකාපුර,

අලකමංඳාව, තපො වනය, ගොකණ්ණක,


පූර්වප්‍රාප්තික වූයේ
{{{before}}}
{{{title}}}
{{{years}}}
අනුප්‍රාප්තික වූයේ
{{{after}}}
title=Emperor of Lanka before=කුවේර රජ years= after=විභීෂණ රජ

}}

මූලාශ්‍ර[සංස්කරණය]

  1. ඔබේසේකර, මිරැන්ඩෝ (2015). ශ්‍රී ලකාවේ පුරාණ අංගම් ශාස්ත්‍රය: ආත්මාරක්ෂක සටන් මූලධර්ම සහ විකාශනය. සමන්තී පොත් ප්‍රකාශකයෝ. ISBN 978-955-084-132-5. 
  2. සෙනෙවිරත්න, ආරියදාස (1999). ශ්‍රී ලකා රාවණා රාජධානිය. සමයවර්ධන. පිටු 80. ISBN 955-570-017-6. 
  3. 3.0 3.1 3.2 සුගතදාස, හර්ෂා. රාවණා කතාව සිංහල බෞද්ධ ඉතිහාසය විකෘති කිරීමට ගෙතූ ප්‍රබන්ධයක්:රාවණා ගැන සොයන පාර්ලිමේන්තු යෝජනාවට හෑගොඩ විපස්සි හිමිගේ විරෝධය ලක්බිම. 2015. 10. 26
  4. සෙනෙවිරත්න, ආරියදාස (1999). ශ්‍රී ලකා රාවණා රාජධානිය. සමයවර්ධන. ISBN 955-570-017-6. 
  5. සෙනෙවිරත්න, ආරියදාස (1999). "ලංකෙශ්වර රාවණාගේ ලංකා නගරය පිහිටා තිබුණේ වර්තමාන සීගිරි පව්වෙහිය.". ශ්‍රී ලකා රාවණා රාජධානිය. සමයවර්ධන. පිටු 130-136. ISBN 955-570-017-6. 
  6. සෙනෙවිරත්න, ආරියදාස (1999). "-තිරිකුණාමලය- කෝණයෙහි උතුම් කන්ද නොවේ". ශ්‍රී ලකා රාවණා රාජධානිය. සමයවර්ධන. පිටු 137-144. ISBN 955-570-017-6. 
  7. සෙනෙවිරත්න, ආරියදාස (1999). ශ්‍රී ලකා රාවණා රාජධානිය. සමයවර්ධන. පිටු 148-149, 159-177. ISBN 955-570-017-6. 

රාවණ tv දෙරණ, ඉතිහාසයේ හෙළ යුගය-සූරිය ගුණසේකර

තවද බලන්න[සංස්කරණය]

"https://si.wikipedia.org/w/index.php?title=රාවණා_රජ&oldid=441685" වෙතින් සම්ප්‍රවේශනය කෙරිණි