සුක්-බින් චෝයි

විකිපීඩියා, නිදහස් විශ්වකෝෂය වෙතින්
(චෝයි සුක්-බින් වෙතින් යළි-යොමු කරන ලදි)
Jump to navigation Jump to search
සුක්-බින් චෝයි
රාජකීය වංශවත් බිසව ශ්‍රේණිය 1
නිල කාලය1699 – 1718 අප්‍රේල් 9
උපත1670 දෙසැම්බර් 17
මරණයApril 9, 1718(1718-04-09) (වයස 47)
ඉහ්යොන් මාලිගය, දකුණු කොරියාව
භූමදානයසෝර්යොංවොන්
වල්ලභයාජොසොන්හි සුක්ජොං රජු
දරුවන්ජොසොන්හි යොංජෝ රජු
වංශයහේජු චෝයි
පියාචෝයි හ්යෝ-වොන්
සුක්-බින් චෝයි
හංගුල්숙빈 최씨
හංජා
සංශෝධිත රොමානුකරණයසුක්බින් චෝයිසි
මෙකන්–රයිෂවර්සුක්පින් චෝයිසි

හේජු චෝයි වංශයේ රාජකීය වංශවත් සුක් බිසව (හංගුල්: 숙빈최씨; හන්ජා: 淑嬪崔氏) (1670 දෙසැම්බර් 17 – 1718 අප්‍රේල් 9) යනු ජොසොන්හි සුක්ජොං රජුගේ උපබිසෝවරුන් අතරින් වඩාත් ප්‍රකටම උපබිසවකි. අනාගතයේදී රාජකීය වංශවත් සුක් බිසව බවට පත් වන ඇය උපත ලැබූයේ 1670 ජොසොන්හි හ්යොන්ජොං රජුගේ එකොලොස්වන වර්ෂයේ එකොලොස් වන චන්ද්‍ර මාසයේ සය වන දිනයේ ය. ඇය චෝයි හ්යෝ-වොන් සහ නම්යංහි හොං ආර්යාවගේ (1639–1673) බාලම දියණියයි.[1] (හංගුල්: 최효원; හන්ජා: 崔孝元; 1638–1672) ඇයට චෝයි දොං-හු (හංගුල්: 최후; හන්ජා: 崔垕) නමින් වැඩිමහල් සොයුරකු වූ අතර, ඔහු සුන්හ්‍යුංහි අන් ආර්යාව සමග විවාහ විය. ඇයට සිටි එකම වැඩිමහල් සොයුරිය, සියෝ ජොන් (හංගුල්: 서전; හන්ජා: 徐專) සමග විවාහ වූවා ය.

චරිතාපදානය[සංස්කරණය]

වයස අවුරුදු 7දී ඇය මාලිගයට ඇතුළු වූවා ය. ඇය අයත් වූයේ ජොසොන් රාජවංශයේ පහත්ම පන්තිය වූ "චොන්මින්" සමාජ පන්තියටයි. නමුත් ඇය පළමුව රජුව දැන හඳුනාගත් අයුරු නොදනී. වඩාත් පිළිගැනෙන මතය නම්, ඇය "මුසුරිවරියක" ලෙස (උදාහරණ ලෙස මාලිගයේ දිය ගෙනයන්නියක්, මාලිගයේ වහල් සේවිකාවක් වැනි)[2] ඉන්හ්යොන් අගබිසව පිටුවහල් කොට ජෑං හුයි-බින් උපබිසව අගබිසව තනතුරට පත්ව සිටි සමයේ මාලිගයේ සේවය කරන්නට ඇති බවයි. එක් රැයක, චෝයි සුක්-බින් ඉන්හ්යොන් අගබිසවගේ සුවය පතා යාඥා කරමින් සිටින විට, ජොසොන්හි සුක්ජොං රජු සංචාරක නිරතව සිට නැවත මාලිගයට පැමිණෙමින් සිටියේ ය. ඔහුට මෙය ඇසුණු අතර ඇගේ වදන්වලින් කම්පාවට පත් විය. යි මුන් ජොං (1656–1726) විසින් රචිත 수문록 ග්‍රන්ථයේ[3] ජෑං හුයි-බින් බිසවට දඬුවම් පැමිණවීමට අදාළ සිදුවීම් විස්තර කොට ඇත. සුක්ජොං රජ සමයේ ජීවත් වූ මෙම රචකයා එය මෙලෙස සඳහන් කරයි:

"එක් රැයක, රජුට [සුක්ජොං] නිදාගැනීමට නොහැකි විය. නින්ද ඔහු කරා ළඟානොවිණි. ඔහු පිටතට යාමට තීරණය කළේ ය. නැවත මාලිගයට පැමිණෙමින් සිටින අතරතුර, සේවක කුටි පසුකරන විට ඔහුට කුඩා කුටියක් දෙසින් ඉකිබිඳින හඬක් ඇසිණි. කුතුහලයෙන් යුතුව, ඔහු කාමරය තුළට එබී බැලී ය. එම පිරිසිදු පිළිවෙල කාමරය දැක ඔහු පුදුමයට පත් විය. එතැන භෝජන සංග්‍රහයක් ලෙස පූජාවක් සකස් කොට තිබූ අයුරු ඔහු දුටුවේ ය. අනතකුරුව ඔහු දුටුවේ තරුණ මාලිග මුසුරිවරියක් සිය නිල ඇඳුමෙන් යුතුව සිහිවටන මේසයක් ඉදිරිපස වැළපෙන අයුරු ය. මෙම අනුස්මරණ මේසය සකසා තිබුණේ හිටපු අගබිසව වූ ඉන්හ්යොන් වෙනුවෙනි. ඉන්හ්යොන් අගබිසව මේ වන විට බලයෙන් පහකොට තිබූ බැවින් රජු පුදුමයට පත් විය. මුසුරිවරිය සිහිවටන ඵලකයක් තබා තිබූයේ, බලයෙන් පහකළ ඉන්හ්යොන් අගබිසව රජු වෙනුවෙන් සිය දිවිය කැපකර තිබූ නිසාවෙනි. නමුත් ජෑං හුයි බින් අගබිසවගේ බලපෑම හේතුවෙන් කිසිවකු බලයෙන් පහකළ අගබිසව අනුස්මරණයට ඉදිරිපත් වූයේ නැත. තමන්ට ද, ඉන් දඬුවම් හිමිවේ යැයි ඔවුහු බිය වූහ. මෙවන් ව්‍යසනාකාරී වාතාවරණයක් යටතේ සිය ජීවිතය ගැන නොතකා, ඉන්හ්යොන් අගබිසවගේ යහපත පතා පූජාවක් පැවැත්වීමට යමකු ඉදිරිපත් වීමෙන් රජු විස්මයට පත් විය. ඔහු ඇයව ඇමතී ය. මුසුරිවරිය (පසුකලෙක චෝයි සුක් බින් බවට පත් වන) ඔහුගේ හඬ ඇසී හැරී බැලී ය. රජුව දැකීමෙන් ඇය තැතිගත්තා ය. ඔහුව හඳනාගත් ඇය ඔහුගේ දෙපාමුල වැටුණා ය. ඔහු ඇයට මේ පිළිබඳ පැහැදිළි කරන මෙන් පැවසී ය. වෙව්ලන හඬින් යුතුව මුසුරිවරිය පිළිතුරු දුන්නේ, "චොන් නා, මා ඉන්හ්යොන් අගබිසව, අගබිසවව සිටි සමයේ ඇය වෙනුවෙන් සේවය කළා. අද ඇගේ උපන් දිනයයි. මා ඇය යටතේ සෙවය කළ සමයේ ඉන්හ්යොන් අගබිසව මා වෙත දැක් වූ කරුණාව මා හට අමතක කළ නොහැකියි. එම නිසා මා පෞද්ගලික මට්ටමින් ඇය වෙනුවෙන් අනුස්මරණයක් සූදානම් කළා. කරුණාකර මට මරණ දඬුවම ලබා දුන මැනවි" මෙම කන්නලව්ව ඇසීමෙන් රජු පුදුමයට පත් විය. ඇගේ තත්ත්වයේ සිටින සෙස්සන් සිය ජීවිතය ආරක්ෂා කරගැනීමට මෙවන් අවදානමක් ගත්තේ නැත. නමුත් මෙම මුසුරිවරිය හිටපු අගබිසව වෙනුවෙන් මෙම මරණීය අවදානම ගත්තා ය. ගුණවත්, පැසසිය යුතු අයකු වූ ඇගේ හැසිරීමෙන් රජු සලිත විය. අනතුරුව ඔහු එම තරුණ මුසුරිවරිය සිය සිරියහන් කුටිය වෙත රැගෙන ගියේ ය. ඔහුගේ අනුකම්පාව ප්‍රේමයක් බවට පරිවර්තනය විය. ඔහු ඇය සමග බොහෝ රාත්‍රියයන් ගතකළේ ය. කාලයත් සමග මෙම මුසුරිවරිය චෝයි සුක් බින් බිසව ලෙස ප්‍රකට විය".

රජුගේ ප්‍රසාදය දිනූ ඇය, සුක්ජොං රජුගේ දහනවවන වර්ෂයේ (1693) සිව්වන චන්ද්‍ර මාසයේ, ඇය සුක්ජොංගේ සුක්-වොන් නිල මට්ටමේ උපබිසවක් බවට පත් වූයේ කුමරකුට උපත ලබාදීමත් සමගයි. නමුත් එම කුමරු කුඩාකල මියගියේ ය. 1694දී, සුක්ජොංගේ විසිවන වර්ෂයේ, ඇය විසින් යෙඔනිං කුමරුට උපත ලබාදීමත් සමග, ඇයව සුක්-උයි (රාජකීය වංශවත් බිසව, ශ්‍රේණිය 2) නිලමට්ටමට උසස් කරන ලදී. 1695දී, ඇයව නැවත ග්වයි-ඉන් නිලයට උසස් කෙරිණි. 1698දී ඇය තවත් කුමරකුට උපත දුන් නමුත් එම දරුවා උපතේදී මියගියේ ය. 1699දී ඇයව බින් (රාජකීය වංශවත් බිසව ශ්‍රේණිය 1) නිලයට උසස් කොට , "පවිත්‍ර" යන අරුතැති සුක් (淑) නැමැති නාම විශේෂණය ලබා දෙන ලදී.

චෝයි උපබිසව විවෘතව ඉන්හ්යොන් අගබිසවට සහාය පලකළ අතර, ඉතිහාසයේ කෲර ස්ත්‍රියක ලෙස සඳහන් වන ජෑං හුයි-බින් බිසවට විරුද්ධව කටයුතු කළා ය.[4] 1693දී, රජු තුළ ජෑං හුයි-බින් සහ දක්ෂිණ පක්ෂය කෙරෙහි ඇති විශ්වාසය නැති වන්නට විය. 1694දී සුක්ජොං රජු නැවත ඉන්හ්යොන් අගබිසව මාලිගයට කැඳ වූ අතර, ජෑං අගබිසව හුයි-බින් උපබිසෝ තනතුරට පහත හෙළී ය. 1701දී, ඉන්හ්යොන් අගබිසව හඳනා නොගත් හේතුවක් නිසා මියගියා ය; ඇතැම් ඉතිහාසඥයන් පවසන්නේ ඇයට වස දුන් බවයි. නමුත් මෙය තහවුරු වී නොමැත. එක් විස්තරයක් අනුව, ජෑං හුයි-බින් බිසව සිය කුටිය තුළ කොරියානු යකැදුරුවරියක සමග ඉන්හ්යොන් අගබිසව මරණයට පත්කිරීමට හූනියමක් සිදු කරමින් සිටනු සුක්ජොං රජු දැක ඇත.[5][6] ජොසොන් රාජවංශයේ වාර්ෂික වාර්තා පදනම් කරගත් අපැහැදිළි සටහනක් ආධාරයෙන් සිදුකළ තවත් අනුමානයක් අනුව, චෝයි සුක්-බින් විසින්, එම මායාකර්ම අගබිසවට හානි සිදුකිරීමට කළ ඒවා බව රජුට පවසා ඇති බවයි. අගබිසවගේ කැමැත්ත යන තේමාව යටතේ මෙය පහත පරිදි ලියා ඇත: "ඔයිගන් (外间) උද්ධෘතය--"සිය සුපුරුදු ලාලිත්‍යය සමගින් අගබිසවගේ (ඉන්හ්යොන්) ගුණ කියමින් (追慕), සහ වැළපෙමින් (痛哭) රජුගේ සිත දිනාගත නොහැකි වූ තැනැත්තිය වෙනුවෙන් ශෝකවූවා ය. ඇය රජුට සත්‍යය පිළිබඳ හෙළිකළා ය." මෙමගින් පැවසෙන්නේ ඇය රජුට අගබිසවගේ අවසන් වචන පමණක් හෙළිකළ බවයි. නමුත් මාලිගාව තුළ ජෑං හුයි-බින් බිසව යකැදුරුවරයකු ලබා අගබිසවට ශාප කළ බවට කටකතා පැතිරගියේ ය. මින් චින්-වොන් අනුව, ඉන්හ්යොන් අගබිසව මෙම කටකතා පිළිබඳ දැනගෙන ඇත. 1701 අනුවාර්ෂික වාර්තාවන්හි සඳහන් වන්නේ, මින් චින්-වොන් සහ මින් චින්-හු විසින් සුක්ජොං රජුට ජෑං හුයි-බින්ගේ මායාකර්මය පිළිබඳ දැනුවත් කරමින් එය ඉන්හ්යොන් අගබිසව සිය මරණයට පෙර තමන්ගෙන් සිදුකළ ඉල්ලීම බව පැවසූහ.[7]

කෙසේනමුත්, රජු මේ පිළිබඳ දැනගත් අයුරු නොසලකා, කටකතා පසුපස ඇති සත්‍ය සොයාබැලී ය. එහිදී ජෑං හුයි-බින් බිසව සිය මාලිගය තුළ යකැදුරු පුදසුනක් ඉදිකළ බවටත්, එතැනින් ඉන්හ්යොන්ගේ නම සඳහන් කළ බෝනික්කන් හමුවූ බවත් සඳහන් වේ. පසුව, ඇගේ පාලිකාවන් හෙළිකළේ ඇය තමන්ට දිනකට තුන්වර බැගින් ඉන්හ්යොන් අගබිසවගේ රුවකට ඊතල පහර දෙන ලෙස නියෝග කළ බවයි. එසේම ඔවුන් විසින් අගබිසවගේ මාලිගයේ උද්‍යානය තුළ මියගිය සතුන් වැළලීම ද සිදුකොට ඇත.[8] ඇයට සමාව දෙන මෙන් දක්ෂිණ පක්ෂයෙන් නොයෙකුත් අභියාචනා ඉදිරිපත් වූවද, ඇගේ හැසිරීම පවිටු බව සුක්ජොං රජුට හැඟී ගියේ ය. 1701දී, ජෑං හුයි-බින් සහ එයට දායක් වූ සියලු දෙනා වස දී මරණයට පත්කිරීමට රජු විසින් නියෝග කරන ලදී. ඇගේ දඬුවමින් පසු සුක්ජොං රජු "බින්" තනතුරේ කිසිදු උපබිසවකට අගබිසව බවට පත් විය නොහැකි ලෙස වාරණ නියෝගයක් පැනවී ය.[9] අගබිසව තනතුරට ඊළඟ සුදුසුකම් ඇත්තිය චෝයි සුක්-බින් බවට අසත්‍ය මතයක් පැතිර ඇති අතර එය පදනම් විරහිත මතයකි. අගබිසව වීමට ඊළඟ සුදුසු තැනැත්තිය වූයේ කිම් වංශයේ රාජකීය වංශවත් යොං උපබිසව (영빈 김씨) යි. මීට අමතරව, වෙනත් උපබිසවක් වූ යැංබැන් පාන්තිකයකුගේ දියණියක වූ මිර්යැං පාක් වංශයේ රාජකීය වංශවත් මියොං උපබිසව (명빈 박씨) ද, 1699දී කුමරකුට උපත දුන් නිසා ඇය කිම් වංශයේ රාජකීය වංශවත් යොං උපබිසවට පසු, අගබිසව තනතුරට සුදුසුකම් ඇත්තිය ලෙස සැලකෙයි. කොන්ෆියුසියානු සමාජ ක්‍රමය තුළ මුසුරිවරියක ලෙස චෝයි සුක්-බින් උපබිසවගේ පහත් සමාජ තත්ත්වය ඇයට අගබිසව ලෙස සුදුසුකම් ලැබීමට බාධාවක් විය. අපට මෙම කරුණ, සිය මෑණියන්ගේ පහත් සමාජ තත්ත්වය නිසා යොංජෝ රජුට (චෝයි සුක්-බින්ගේ පුත්‍රයා) මුල්කාලයේ නොයෙකුත් තර්ජන එල්ල වීමෙන් වටහාගත හැක. පසුව ඔහුගේ රාජ්‍ය පාලනය ස්ථාපිත කෙරුණ ද, මෙය සිය මවගේ වහල් සමාජ තත්ත්වය හේතුවෙන් සිදු වන්නට ඇතැයි ඔහු වටහාගෙන ඇත.[10]

ඇගේ එකම ජීවත් වූ පුත්‍රයා වූ යෙඔනිං කුමරු (යි ගුම්, පසුව ජොසොන්හි යොංජෝ රජු වූ) කුඩා කල සිටම ආශ්චර්යමත් පුද්ගලයකු වූ අතර, ඔහු ජොසොන් රාජවංශයේ ශ්‍රේෂ්ඨතම රජුන් අතරින් අයකු ලෙස සැලකෙයි.[11] සුක්ජොං රජු සහ චෝයි උපබිසව සිය පුත්‍රයා පිළිබඳ බෙහෙවින් ආඩම්බර වූ අතර, ඔහු වෙනුවෙන් බොහෝ වියදම් කළහ. නමුත් යොංජෝ පහත් කුලයක උපබිසවකට දාව උපන් නිසාත්, සෙසු සියලු නිලධාරීන් වංශවත් නිවෙස්වල ඉපිද, වංශවත් ස්ත්‍රීන් සමග විවාහව සිටි නිසාත්, ඔවුහු කුමරු සහ ඔහුගේ මව පිළිබඳ බැලූයේ අවඥා සහගත අයුරිනි. ඔවුන් සුක්ජොං රජුව, අරපිරිමැස්ම සහ විනීතබව කෙරෙහි දැනුවත් කළ ද, රජු ඔවුන්ව නොසලකා හැරියේ ය.[12] 1704දී රජු යෙඔනිං කුමරුගේ විවාහ මංගල්‍යය උත්කර්ෂවත් අයුරින් බොහෝ වියදම් දරා පැවැත් වී ය. නමුත් රජු කුමරු කෙරෙහි දක්වන අසීමිත ප්‍රියතාවය පිළිබඳ අමාත්‍යවරු රජුට චෝදනා කළහ. එම වර්ෂයේම පසුකලෙක, සුක්ජොං රජු චෝයි සුක්-බින් උපබිසවට සිය ශිශිර මාලිගය වූ ඉහ්යොන් මාලිගය (සුක්ජොං සිය තරුණ විය ගත කළ) ත්‍යාගකළේ ය.

වැඩිවියට පත් යොංජෝ රජු සිය මව පිළිබඳ බෙහෙවින් සවේදී වූ අතර, සිය සැබෑ මෑණියන් වූ චෝයි සුක්-බින් බිසව කෙරෙහි ඔහු තුළ පැවතියේ දැඩි ගෞරවයකි. ඔහු ඇයට නොයෙකුත් කවි ලිවී ය. ඉන් එකක මෙලෙස සඳහන් වේ, "මාගේ පියා මා ඉපද වී ය, මගේ මව මා වැදුවා ය, පෝෂණය කළා ය, මා මෙහෙයවූවා ය, මා ඉහළට ගෙනගියා ය, මා දැඩිකළා ය, මා දෙස නෙත් යොමා සිටියා ය, හැමවිටම මට උපකාර කළා ය. ඔවුන්ගේ යහ ගුණ මා ප්‍රදානය කරන්නෙමි".[13] රාජසභාව තුළ යොංජෝ සිය මෑණියන් වූ චෝයි සුක්-බින් බිසව රාජ්‍ය මෑණියන් ලෙස නම් කිරීමට උත්සාහ ගත්තේ ය. නමුත් ඇය සෙසු උපබිසෝවරුන් මෙන්—රජකුගේ වම වුවත්, "රජුගේ පෞද්ගලික මව" ලෙස සැලකිණි. නමුත් එය වෙනස් කිරීමට යොංජෝට අවශ්‍ය වූ අතර, ඇයව සිය "රාජ මෑණියන්" ලෙස පත්කිරීමට අවශ්‍ය වුවත්, නිලධාරීන් එයට විරුද්ධ වූයේ අමාත්‍යවරුනට ඇය ගරුකිරීමට සිදු වන නිසා ය. නමුත් රජුට සිය රාජකීය උත්සවවල කොටසක් ලෙස සිය මවගේ සොහොන බැහැ දැකීමට ඇයි අයිතියට ඔවුහු ගරුකළහ.

මෙම තත්ත්වය පිළිබඳ ඔහුගේ සිතිවිලි අන්තර්ගත රසවත් වාර්තා දෙනන් පවතී. 1739දී, චෝයි සුක්-බින් බිසවගේ සොහොන නැරඹීමට නියම කරගත් දිනයට පෙර දිනයේ, චාරිත්‍ර කමිටුව ඇඳ තිබූ සිතුවම් පිළිබඳ නොසතුටට පත් රජු එයට වගකිව යුතු නිලධාරීන් දෙනෙකුට දෝෂාරෝපණය කර ඇත. මේ පිළිබඳ සිලොක් (අනුවාර්ෂික වාර්තාවේ) සඳහන් වන්නේ, "රජු ගෞරවණීයව සිය පෞද්ගලික මෑණියන්ට [චෝයි සුක්-බින්] සැලකී ය. නමුත් සිය ආශාව ඉටු කරගැනීමට සිය නිලධාරීන් අකමැති බවට ඔහු සැකකළේ ය. සෑම අවස්ථාවක දී ම, නොයෙකුත් හැලහැප්පීම් සිදු වූ අතර, ඒ අවස්ථා රාජ උදහසට ලක් විය. "වෙනත් අවස්ථාවක, රජු ඇගේ සොහොන දැක මාලිගයට පිටත් යෙමින් පැවතිණි. දෝලාවට නැගීමට නියමිතව පැවති අවස්ථාවේ ඔහු යුධ කටයුතු අමාත්‍යවරයා වූ කිම් සොංගුං කැඳවී ය. ඉකිබිඳිමින් ඔහු පැවසූයේ, "1737 සිට, මම මාගේ මවට ආචාර දැක්වීමට පැමිණි පළමු අවස්ථාව මෙයයි. පසුගිය වසරවල, මගේ හද ශෝකයෙන් පිරී තිබිණි. දරුවන් ඇද වැටෙන විට, ඔවුන් ඉබේම සිය මවට හඬනගයි. එය මිනිස් ස්වභාවයයි. නිමිති කී අවස්ථාවේ, කිසිදු අයෙකු මහපොළොවට සත්කාර නොකරන්නේ නම්, එහි කෙසේද දිව්‍යත්වයක් ඇත්තේ? මා විසින් නියෝග දී ඇත. [ඔහුගේ මෑණියන් රාජ්‍ය හෝ නීත්‍යානුකූල මෑණියන් බවට පත් කිරීමට] නමුත්, එය භාර කාර්යාංශ එය නොසලකා හැර තිබේ. ඇත්ත වශයෙන්ම, පාලකයකුට සිය පෞද්ගලික අවශ්‍යතා සලකා බැලීමට අවසර නැහැ. නමුත් [සිය නිලධාරීන් අතර] විශ්වාසය තබාගත නොහැකි වීම වරදකි. ප්‍රභූ විද්වතුන් අදවන විට දැඩි-සිත් ඇති අය බවට පත්ව ඇත. මේ ප්‍රභූ විද්වතුන්ට ද දෙමව්පියන් සටිනවා. ඔවුන් දෙව්ලොවෙන් බට අය හෝ පොළොවෙන් පැනනැගුණු අය නොවෙයි."[14] අවසානයේ ඔහු තම අරමුණ ඉටු කරගත් අතර, චෝයි සුක්-බින් උපබිසව ඔහුගේ රාජ්‍ය මාතාව ලෙස නම්කරන ලදී.

1699-1702 අතර කාලයේ, හ්වෙයොම්සා විහාරයේ ගඛ්වංජොන් ශාලාවේ ප්‍රධාන දානපතිනිය ලෙස චෝයි වංශයේ රාජකීය වංශවත් සුක්-බින් උපබිසව කටයුතු කොට ඇත.

1703දී, ඉන්වොන් අගබිසව විසින් යෙඔනිං ගුම් කුමරුන්ව හදාවඩා ගනු ලැබූ අතර, ඇගේ ප්‍රියතම පුතු වූ ඔහුට ඇය සිය පුතකු මෙන් සලකා ඇත.[15]

1704දී, ජොසොන්හි වාර්ෂික වාර්තාවන් අනුව යෙඔනිං ගුම්ගේ විවාහ මංගල්‍යයට රජු විශාල මුදලක් වියදම් කොට ඇත. විවාහ මංගල්‍යයේ වියදම පිළිබඳ වංශවත්හු පැමිණිලි කරන්නට වූහ. (ඔහු උපබිසවකගේ පුතකු සහ කිරුළහිමි කුමරුන් නොවීම නිසා)[16]

1704දී, ජොසොන් රාජවංශයේ වාර්ෂික වාර්තා පවසන්නේ සුක්ජොං විසින් චෝයි සුක්-බින් උපබිසවට ඉන්හ්යොන් මාලිගය ප්‍රදානය කළ බවත්, අනතුරුව ඇය 1711දී සිය පුතුගේ විවාහය වෙනුවෙන්, පුතුට එය ප්‍රදානය කළ බවයි.[17] එය සෝල් නුවර පිහිටි විශාල, ඉඩකඩ සහිත මාලිගයක් වූ බව පැවසේ.

1711දී, ඉන්වොන් අගබිසවට වසූරිය වැළඳුණු අවස්ථාවේ, චෝයි උපබිසව පාලිකාවට මාලිගයෙන් පිටතට ගොස් අගබිසව සුවපත් කළ හැකි අයකු සාමාන්‍ය ජනයා අතුරින් සොයාගෙන එන ලෙස නියෝගකළා ය. අවසානයේ ඇය සුවපත් විය.

1716දී, රෝගී වීම හේතුවෙන් චෝයි සුක්-බින් බිසව මාලිගයෙන් පිටතට රැගෙන යන ලදී. එම වර්ෂයේම පසු කලෙක සුක්ජොංට ලිපියක් යවමින් යෙඔනිං ගුම් කුමරු සිය මෑණියන්ගේ සෞඛ්‍ය තත්ත්වය අසාධ්‍ය බවත්, ඇයට වෛද්‍ය ආධාර එවන ලෙසත් ඉල්ලා සිටියේ ය.[18]

1717දී, සුක්ජොං දේශපාලනයෙන් විශ්‍රාම ගත් අතර, සිය පුතු වූ කිරුළහිමි කුමරුට රජයේ බොහෝ කටයුතු පාලනයට පවරන ලදී.[19]

1718දී, 49 වියැති රාජකීය වංශවත් චෝයි සුක්-බින් බිසවගේ අභාවය ඉන්හ්යොන් මාලිගයේදී සිදු විය.[20][21] එම වර්ෂයේදී ම, සුක්ජොං රජු කිරුළහිමි ග්යොංජොං කුමරුන්ව සිහසුනට පත්කළේ ය.

ඇගේ සිහිවටන ඵලකයෙහි (මෙය සොර්යොංවොන්හි ඇගේ රාජකීය සොහොන්ගැබේ ඇත),[22] ඇගේ චරිතය පිළිබඳ විස්තරයෙහි මෙලෙස සඳහන් වේ: "ඇගේ චරිතය සහ ඇගේ තත්ත්වය අනභිබවනීයයි. ඇය ජනයාව අංශු මාත්‍රයකුදු සැකකළේ නැත. ගෞරවනීය තැනැත්තියක වූ ඇය, නිරතුරුවම ඉන්හ්යොන් අගබිසව සමීපයේත්, අනතුරුව ඉන්වොන් අගබිසව සමීපයේත් රැඳීසිටියා ය. ඇගේ ප්‍රඥාව සහ බුද්ධිය සෙස්සන් ඇතර ඇයව බැබලවී ය. ඇය සිය යුතුකම් සහ වගකීම් මැනවින් ඉටුකළා ය. ඇය කිසිදින මාලිගයේ ආරවුල්වලට මැදිනොවූවා ය. ඇය සිය දිවිය සාමයෙන් සහ සමාදානයෙන් ගතකළා ය." ඇයව පාජු ප්‍රදේශයේ සොර්යොංවොන්හි (昭寧園) භූමදානය කරන ලදී. මෙම ස්ථානය ඓතිහාසික ස්ථානය අංක. 358 (ලිපිනය: 267 යොංජං-රි, ග්වංතන්-ම්යොන්, පාජු, ග්යොංගි පළාත) ලෙස නම්කොට ඇත.

1720දී සුක්ජොං රජු මියගිය අතර, ඔහු මියයාමට පෙර, යි යි-ම්යොං කුමරුට, යෙඔනිං කුමරුන්ව ග්යොංජොං රජුගේ අනුප්‍රාප්තිකයා ලෙස පත්කරන මෙන් පවසා තිබිණි.

ඇගේ පුතු රාජ්‍යත්වයට පැමිණි පසු, යොංජෝ රජු ඇගේ සොහොන්ගැබ අසල ශෝක වීම සඳහා ජෙසිලයක් ස්ථාපනය කළේ ය. ඇගේ සොහොන වටා සිව්කොනේ ඵලක ගෘහ සතරක් ඉදි කිරීමට අමතරව, ඔහු සොහොන්ගලක් ද ඉදිකළේ ය. එහි අන්තර්ගතය ඔහු විසින් ලියවන ලද්දකි. ඇගේ සමරු ඵලකය පසුව යුක්සංම්යෝ ("පූජාසනය") ලෙස හැඳින්වුණු සක්බින්ම්යෝ සහ චිල්ගුං (ඓතිහාසික ස්ථානය අංක. 149) පෙදෙසෙහි නිදන්කොට ඇත. එහි අගබිසවගේ තත්ත්වයට එළැඹිය නොහැකි වූ, රජවරුන්ට උපත දුන් තවත් රාජකීය උපබිසෝවරුන් හත් දෙනකුගේ සමරු ඵලක තැන්පත් කොට ඇත.

චෝයි උපබිසවට ඇගේ මරණින් පසු, "හ්වාග්යොං ආර්යාව, චෝයි වංශයේ රාජකීය වංශවත් සුක් බිසව" (හංගුල්: 화경숙빈최씨; හන්ජා: 和瓊淑嬪崔氏) යන මරණාපර නාමය ලබා දිණි. එසේම ඇයව 1753දී, හ්වා-ග්යොං ("සුමිහිරි ප්‍රණාමය") සහ නැවත හ්වි-දොක් ("උතුම් සද්ගුණය") සහ අන්-සුන් ("ශාන්ත පාරිශුද්ධය") වන මරණාපර නාමයන්ට ඔසවා තබන ලදී.

පවුල[සංස්කරණය]

පූර්වජයින්[සංස්කරණය]

දරුවන්[සංස්කරණය]

රාජකීය වංශවත් සුක් බිසව, සුක්ජොං රජුට දාව පුතුන් තිදෙනකු බිහි කළා ය:

  • යොංසු කුමරු (1693), කුඩා කල මියගියේ ය.
  • යෙඔනිං කුමරු (1694–1776), පසුකලෙක යොංජෝ රජු බවට පත් විය.
  • නම් නොලද පුත්‍රයෙක් (1698), කුඩා කල මියගියේ ය.

ජනප්‍රිය සංස්කෘතිය තුළ[සංස්කරණය]

මූලාශ්‍ර[සංස්කරණය]

  1. ඔහුගේ මරණින් පසු යොංජෝ රජු විසින් සිය මාතෘ පාර්ශ්වීය සමාජ මට්ටම ඔසවා තැබීම සඳහා ඔහුව නිලයෙන් ඔසවා තැබූ අතර, ඔහුව අග්‍රාමාත්‍ය තනතුරට හිමි නාමය ප්‍රදානය කළේ ය.
  2. "ද කොන්ෆියුෂියන් කිංෂිප් ඉන් කොරියා, යෝංජෝ ඇන්ඩ් ද පොලිටික්ස් ඔෆ් සැගසිටි " ජාහ්යුන් කිම් හාබූස් විසිනි, පිටුව.57
  3. "수문록 1 표지".
  4. බයර්ස්, ක්‍රිස්ටෝෆර්. "ද යි ඩයිනාස්ටි ජීනියලොජි". ද රෝයල් ආක්. Retrieved 2013-08-20.
  5. ලී, බේ-යොං (2008). විමෙන් ඉන් කොරියන් හිස්ට්‍රි. එව්හා වුමන්ස් යුනිවර්සිටි ප්‍රෙස්. පි. 81; 109–111. 
  6. https://archive.org/stream/historyofkorea02hulbuoft#page/160/mode/2up
  7. ද කොන්ෆියුෂියන් කිංෂිප් ඉන් කොරියා: යෝංජෝ ඇන්ඩ් ද පොලිටික්ස් ඔෆ් සැගසිටි, ජාහ්යුන් කිම් හාබූෂ් විසිනි පිටුව. 265
  8. විමෙන් ඉන් කොරියන් හිස්ට්‍රි 한국 역사 속의 여성들 පිටුව.111
  9. http://www.exploringkorea.com/daebinmyo-tomb-at-seooreung-tombs/
  10. ද කොන්ෆියුෂියන් කිංෂිප් ඉන් කොරියා: යෝංජෝ ඇන්ඩ් ද පොලිටික්ස් ඔෆ් සැගසිටි, ජාහ්යුන් කිම් හබූෂ් විසිනි. පිටු 57-58.
  11. https://archive.org/stream/historyofkorea02hulbuoft#page/164/mode/2up
  12. "ද කොන්ෆියුෂියන් කිංෂිප් ඉන් කොරියා: යෝංජෝ ඇන්ඩ් ද පොලිටික්ස් ඔෆ් සැගසිටි", පිටුව 57
  13. "කොන්ෆියුෂියන් කිංෂිප් ඉන් කොරියා: යෝංජෝ ඇන්ඩ් ද පොලිටික්ස් ඔෆ් සැගසිටි", පිටුව 280
  14. "ද කොන්ෆියුෂියන් කිංෂිප් ඉන් කොරියා: යෝංජෝ ඇන්ඩ් ද පොලිටික්ස් ඔෆ් සැගසිටි" ජාහ්යුන් කිම් හාබූෂ් විසිනි, පිටුව 55.
  15. ද කොන්ෆියුෂියන් කිංෂිප් ඉන් කොරියා: යෝංජෝ ඇන්ඩ් ද පොලිටික්ස් ඔෆ් සැගසිටි, පිටුව, 53.
  16. ජොසොන්හි වාර්ෂික වාර්තා, සුක්ජොං 26 පෙබරවාරි 21.
  17. ජොසොන්හි වාර්ෂික වාර්තා සුක්ජොං,30 http://sillok.history.go.kr/inspection/inspection.jsp?mTree=0&id=ksa
  18. ජෝසොන්හි අනුවාර්ෂික වාර්තාව, සුක්ජොං 42
  19. හ්යේග්යොං ආර්යාවගේ මතක සටහන්, පිටුව 22.
  20. උපබිසෝවරුන් චංදොක්ගුජ මාලිගයෙන් පිටත මියයාම සිරිතක් විය. ඇතැම් අගබිසෝවරුන් ස්වකැමැත්තෙන්ම චංදොක්ගුං මාලිගය හැරගොස් තමන්ට අයත් පෞද්ගලික මාලිගයක් තුළ මරණයට පත් වූ අවස්ථා ඇත.
  21. ද කොන්ෆියුෂියන් කිංෂිප් ඉන් කොරියා: යෝංජෝ ඇන්ඩ් ද පොලිටික්ස් ඔෆ් සැගසිටි පිටුව. 58
  22. http://jikimi.cha.go.kr/english/search_plaza_new/ECulresult_Db_View.jsp?VdkVgwKey=13%2C03580000%2C31
  23. ලී, ගා-ඔන් (2010 මැයි 7). "හන් හ්යෝ-ජූ සේස් ෂී "හෝල්ඩ් ෆාස්ට්" ටු හර් රෝල් ඉන් දොං යි". 10ඒෂියා. Retrieved 2013-02-03. Check date values in: |date= (help)
  24. සුන්වූ, කාර්ලා (2013 පෙබරවාරි 4). "කාරා'ස් හන් ටු වර්ක් විත් කිම් තේ-හී". කොරියා ජූංඇං ඩේලි. Retrieved 2013-02-03. Check date values in: |date= (help)
  25. මුම්යුං, ලී (2016 පෙබරවාරි 4). "යූන් ජින්-සියෝ කාස්ට් ඈස් චෝයි සුක්-බින් ඉන් දේබක්". ද චෝසුන් ඉල්බෝ. Retrieved 2016-03-29. Check date values in: |date= (help)
"https://si.wikipedia.org/w/index.php?title=සුක්-බින්_චෝයි&oldid=381138" වෙතින් සම්ප්‍රවේශනය කෙරිණි