ඉන්දියානු ජාතික ක්‍රිකට් කණ්ඩායම

විකිපීඩියා, නිදහස් විශ්වකෝෂය වෙතින්
වෙත පනින්න: සංචලනය, සොයන්න

ටීම් ඉන්ඩියා සහ මෙන් ඉන් බ්ලූ ලෙසින්ද හැඳින්වෙන, ඉන්දියානු ක්‍රිකට් කණ්ඩායම, ජාත්‍යන්තර ක්‍රිකට් ක්‍රීඩාව තුල ඉන්දියාව නියෝජනය කරයි. ඉන්දියාවෙහි ක්‍රිකට් පාලක මණ්ඩලය (බීසීසීඅයි) වෙතින් පාලනය වන එය, ජාත්‍යන්තර ක්‍රිකට් කවුන්සිලයෙහි (අයිසීසී) ටෙස්ට්, එක් දින ජාත්‍යන්තර (එදිජා) සහ විස්සයි20 ජාත්‍යන්තර (වි20ජා) තත්ත්වයන් සහිත පූර්ණ සාමාජිකයෙකි.

18වන සියවසෙහිදී යුරෝපියානු වෙළෙඳ නාවිකයන් විසින් ක්‍රිකට් ක්‍රීඩාව ඉන්දියාවට හඳුන්වා දෙමින් 1792 වසරෙහිදී ඉන්දියාවෙහි පළමු ක්‍රිකට් ක්‍රීඩා සමාජය කල්කටා නගරයෙහිදී පිහිටුවනු ලැබුවත්, ඉන්දියාවේ ජාතික ක්‍රිකට් කණ්ඩායම විසින් එහි පළමු ටෙස්ට් තරගය ලෝඩ්ස් ක්‍රීඩාංගණයෙහිදී ක්‍රීඩා කිරීම 1932 ජූනි 25 දින තෙක් පමාවී සිදුවූ අතර, ටෙස්ට් තත්ත්වය පිරිනැමුනු හයවන කණ්ඩායම එය විය. එය විසින් ජාත්‍යන්තර ක්‍රිකට් ක්‍රීඩාවෙහි නියුතු වූ පළමු වසර පනහ තුල, දුර්වල කණ්ඩායම් අතරින් එකක් බවට ඉන්දියාව සැලකුණේ එය ක්‍රීඩා කළ පළමු ටෙස්ට් තරග 196 අතරින් තරග 35 ක් පමණක් එය විසින් දිනා ගත් නිසාය. එහි පළමු ටෙස්ට් ජයග්‍රහණය සඳහා, 1932 වසරෙන් පසුව 1952 වසර දක්වාම, එනම් දළ වශයෙන් වසර 20 ක් පොරොත්තු වීමට ඉන්දියාවට සිදු විය. කෙසේවෙතත්, 1970 ගණන් වලදී සුනිල් ගවාස්කාර් සහ ගුන්ඩප්පා විශ්වනාත් වැනි පිතිකරුවන්, තුන්-ඉරියව් ක්‍රීඩක කපිල් දේව් සහ ඉන්දියානු දඟ පන්දු චතුරංගිකය වූ ඉරාපලි ප්‍රසන්නා, ශ්‍රීනිවාසරාඝවන් වෙන්කටරාඝවන්, භගවත් චන්ද්‍රසේකර් සහ බිෂන් සිං බේදි වැන්නන්ගේ සම්ප්‍රාප්තිය හා සමගම එය වඩාත් ශක්තිමත් කණ්ඩායමක් බවට පත් විය.