දීප්ති කුමාර ගුණරත්න

දීප්ති කුමාර ගුණරත්න යනු ශ්‍රී ලංකාවේ සිටින කලා, දේශපාලන, හා සමාජ විචාරකයෙක්, චින්තකයෙක් සහ ක්‍රියාකාරිකයකු වේ. එක්ස් කණ්ඩායමේ නිර්මාතෘවරයා වූ ඔහු 2004 වසරේ එම සංවිධානය බිඳී යාමෙන් පසු ලංකා පෙරටුගාමී පක්ෂය පිහිටුවා ගත් අතර දැන් එය සමබිම පක්ෂය නමින් පවතී. පංතිය සහ ආර්ථිකය කේන්ද්‍ර කරගත් සම්ප්‍රදායික වාම දේශපාලනයට වෙනස් ව පුද්ගලයන්ගේ මනෝලිංගික කාරණා ඇසුරින් දේශපාලන විචාරයන් සිදුකිරීම තුළින් ඔහුගේ දේශපාලනය වෙනස් මුහුණුවරක් ගනී. එම විචාර තුළ ඔහු ලැකාන්, ජිජැක්, අල්තුෂර් වැනි චින්තකයන් සහ මනෝවිශ්ලේෂණය යොදා ගනී. ගාමිණී විජේතුංග සමග ඔහු විසින් සමකර්තෘත්වය දැරූ යාත්‍රා සඟරාවේත් පසු ව එක්ස් කණ්ඩායම විසින් පළ කළ මාතොට සහ ලන්ඩන් සඟරාවේත්, සමබිම පක්ෂයේ ත්‍රිමාන (3mana.com) වෙබ් අඩවියේත් ලිපි සහ වීඩියෝ දේශන රැසක් ද, කලාව සහ විසංයෝජනය, විනෝදය, හිස්ටීරියාව, ඇසිඩ් වැස්ස වැනි කෘති ද ඔහුගේ බුද්ධිමය දායකත්වයන් අතර වෙයි.

එකී සමාජ දේශපාලන විචාරක ක්‍රියාකාරීත්වයට අමතරව ඔහු කලාකරුවකු ද වෙයි. ප්‍රවීණ සංගීතඥ නවරත්න ගමගේගේ මුල් ම සංගීත අධ්‍යක්ෂණය වන්නේ දීප්ති කුමාර ගුණරත්න නිර්මාණය කළ නිරු-වත් නමැති නාට්‍ය නිර්මාණයේ සංගීතය යි. එමෙන් ම සුගතපාල ද සිල්වා පරිවර්තනය කළ ගොඩෝ එනකං නාට්‍යයේ නිෂ්පාදකවරයා වන්නේ ද ඔහු ය. 1986 දී පළ කළ ඊඩ්න් උයන නමැති කෙටිකතා සංග්‍රහය ද ඔහුගේ නිර්මාණයකි.

දීප්ති කුමාර ගුණරත්න විසින් ලියූ කෘති සහ නිර්මාණ

නිර්මාණ

ඊඩ්න් උයන (1986) - කෙටිකතා සංග්‍රහය
නිරු-වත් (1986) - නාට්‍ය අධ්‍යක්ෂණය

විචාර කෘති

පෘථිවිකරණය සහ හෙජමොනියේ නව ස්වරූප (1999)
සංස්කෘතිය සහ අප්‍රධාන දේශපාලනය (2000)
කලාව සහ විසංයෝජනය (2002)
තනි තටුවෙන් පියාඹන්න (2003)
අදහස් ගේට්ටුව ළඟ (2004)
හිස්ටීරියාව - 2004
ඉර මැදියම - 2005
විනෝදය - 2007
ඇසිඩ් වැස්ස (2014)
විමුක්තිගේ පැතලි යථාර්ථය (2023)
සුන්දරත්වයෙන් පසු කලාව (2023)

අඩවියෙන් බැහැර පිටු