ජානකී සූරියආරච්චි
….ජානකී සූරියආරච්චි යනු ළමා වියේදීම නිර්මාණකරණයට පිවිසුණු, ප්‍රතිභාපූර්ණ, සම්මානනීය ළමා සාහිත්‍ය ලේඛිකාවකි, චිත්‍ර ශිල්පිණියකි. විවිධ අංශයන්හි විවිධ දස්කම් දක්වන ඇය වයස අවුරුදු 8 දී මුල්ම පොත ලියා ඇති අතර, එතැන් සිට මේ දක්වා සුවහසක් දරුවන්ගේ ආදරයට ලක්වූ කතන්දර පොත් 210 කට අධික ප්‍රමාණයක් ස්වතන්ත්‍රව නිර්මාණය කර ඇත. එපමණක් නොව ඇය විසින් නිර්මාණය කරන ලද “පිංචි ඇන්ඞ් ද ඇල්ෆබට්” “සෙල්ලම්පිල්ලම්”https://www.youtube.com/@TikiriAnimations/videos වැනි අධ්‍යාපනික චිත්‍රපට සහ “සිංදුපීඩියා” වැනි ළමා සජීවීකරණ නිර්මාණද, ළමා ලෝකය යහගුණයෙන් චමත්කාරයෙන් පිරවීමට පමණක් නොව, අසීරු ඉගෙනුම් ඉලක්ක ඉතා රසවත්ව ඉක්මනින් ළඟාකර ගැනීමටද ඉමහත් රුකුලක් වී ඇත. බැංකු නිලධාරිනියක ලෙස වෘත්තීය ජීවිතය ආරම්භකළ ඇය පසුව ඉන් ඉවත්ව පූර්ණකාලීනව දරුවන් වෙනුවෙන් නිර්මාණකරණයේ නියැළුණාය.
ඇගේ නිර්මාණ සුවිශේෂ වන්නේ ලිවීමේ හැකියාව නිසාම පමණක් නොවේ. ඇය විවිධ විෂයන්හි තමා ලබා ඇති දැනුම, ඉතා සරල ලෙසත් ඉතා රසවත් ලෙසත් දරුවන්ට ඉදිරිපත් කරන ආකාරය ඉතා අපූරුය. සඳ තරු මල් සමනලූන් සුරංගනාවයන් ගැන පමණක් නොව, තාරකා විද්‍යාව, ග්‍රහලෝක, ජලචක්‍රය, ප්‍රභාසංස්ලේෂණය, හරිතාගාර ආචරණය, ආදී නොයෙක් විද්‍යාත්මක සෞඛ්‍යමය හා පාරිසරික සිද්ධාන්තයන්ද ඉතා රසවත් කතන්දර ලෙස ඉදිරිපත් කරයි. උදා; “පිටසක්වළ කුමාරයා” “එන්න යන්න හඳ බලන්න” “වැහිළිහිණි පැටියා” “කෝ හඳමාමා” “අච්චාරු හෝටලේ” “පැස්තුඩු යානාව” “කෑම සූත්තරේ” “චූටික්කා පුතා කෝ” ඉන් කිහිපයකි.
ඇය දරුවන්ගේ විවිධාකාර වූ පෞරුෂයන් හා චිත්තවේගයන් ඉතා සියුම් ලෙස හඳුනාගනිමින්, තම නිර්මාණ තුළින් දරුවාගේ මනසට ඉතා සාර්ථකව ආමන්ත්‍රණය කරයි. විශාල පරිකල්පන පරාසයක් තුළ විවිධ තේමා ඔස්සේ ඈ මවන නිර්මාණ තුළින්, පූර්ව ළමාවිය සංවර්ධනයේදී ඉතා වැදගත් වන ආදරය, කරුණාව, වගකීම, වගවීම, චිත්තවේගී බුද්ධි වර්ධනය, සහකම්පනය, යහපත් ආකල්ප, වැනි බොහෝ දේ ඉතා සරල මටසිලූටු භාෂා රටාවකින් කුඩා දරුවන්ගේ සිත් තුළ කලක් පුරා රැඳෙන සේ නිර්මාණය කරයි.
එමෙන්ම ජීවිතයේ ඇතිවිය හැකි ගැටලූ, පීඩනය, ජය පරාජය, දරාගැනීම්, අභියෝගවලට මුහුණ දීම්, මුදල් පරිහරණය, අවට ලෝකය හඳුනාගැනීම, සෘජු නිරවුල් චින්තනය, ඉතිහාසය, දේශාභිමානය, අනාගත නායකත්ව ගුණාංග, ඵලදායී පුරවැසිභාවය වැනි මාතෘකා පිළිබඳවද ඉතා සුන්දර, ආදරණීය හා අනුවේදනීය ලෙසත්, විවිධ ආකාරයේ ප්‍රකාශන ශෛලීන්වලින් ඇය අපූරුවට ඉදිරිපත් කරයි. “රසුමන්දි” “අප්පච්චි” “අප්-පිච්චා” “චන්දුතමී” “බුන්ටු” “බිංකා” “ට්වින්ක්ලින්කා” “කේන්ති කීයද” “විකුම්ගේ ලෝකය” “චූටිගේ සාප්පු සවාරිය” එවන් කිහිපයක් ලෙස සඳහන් කළ හැක.
ඇගේ ළමා පොත්, දෙස් විදෙස් විශ්වවිද්‍යාලයන්හි අධ්‍යාපන මනෝවිද්‍යා පර්යේෂණ නිබන්ධනවලටද භාවිතකර ඇත. එමෙන්ම ඇමරිකානු මේරිලන්ඞ් විශ්වවිද්‍යාලය මගින් පවත්වාගෙන යන ජාත්‍යන්තර ඩිජිටල් පුස්තකාලයේද ලොව විවිධ රටවල වටිනා ළමා සාහිත්‍ය කෘති අතරට ඇගේ පොත් බොහොමයක්ද තෝරාගෙන ඇත. එමෙන්ම ශී‍්‍ර ලංකාවේ රාජ්‍ය සාහිත්‍ය සම්මානද ඇය කිහිප වතාවක් ලබා ඇත.
- රාජ්‍ය සාහිත්‍ය සම්මාන - 2004
- රාජ්‍ය සාහිත්‍ය සම්මාන - 2004
- රාජ්‍ය සාහිත්‍ය සම්මාන - 2007
- රාජ්‍ය සාහිත්‍ය සම්මාන - 2015
- බුන්කා සම්මානය (ජපානය) -2005
ලිවීමට හා ඇඳීමට අමතරව ඇය විසින් නිර්මාණය කරනලද අධ්‍යාපනික කාටූන් චිත්‍රපට තුළද ඇගේ සුවිශේෂ හැකියාවන් මනාව දැකගත හැක. 2013 දී එළිදැක්වූ” පිංචි ඇන්ඞ් ද ඇල්ෆබට්” “සෙල්ලම් පිල්ලම්” හා “සිංදු පීඩියා” ශී‍්‍ර ලංකාවේ මෙතෙක් දරුවන් වෙනුවෙන් බිහිවී ඇති සුවිශේෂතම නිර්මාණවලින් කිහිපයක් ලෙස හැඳින්විය හැක. ඒවායේ තිර රචනයෙන්, අධ්‍යක්ෂණයෙන්, ඉගෙනුම් ක්‍රමශිල්ප සැකසීමෙන්, ගායනයෙන්, චිත්‍රවලින්, සජීවීකරණයෙන්, තනු නිර්මාණයෙන්, දෙබස් හඩකැවීමෙන්, පරිගණක ශබ්ද තාක්ෂණයෙන්, ආදී විවිධ අංශයෙන් දායක වෙමින්, දරුවන්ගේ ළමා ලෝකයේ නොමැකෙන මතක සටහන් තැබීමට ඇය සමත් වී ඇත. මෙහිදී, සාම්ප‍්‍රදායික ඉගෙනුම් ක්‍රමශිල්පවලින් තරමක් බැහැරව, බහුමාධ්‍ය තාක්ෂණය සමඟ නවීනතම අධ්‍යාපන මනෝවිද්‍යා ක්‍රමශිල්ප සියුම්ව භාවිත කරමින්, ළමා සිත් චමත්කාරයෙන් පිරෙන අයුරින්, සැහැල්ලූ සංගීතමය විනෝදාත්මක ඉගැන්වීම් කලාවක් යොදාගෙන ඇත. එතුළින් දරුවන්ගෙන් ක්‍රමයෙන් ඈත්වෙමින් තිබුණු අපේ සිංහල භාෂාව දරුවන්ගේ නොමඳ ආදරයට පාත්‍රවීමද විශේෂත්වයකි. දරුවන්ට හරියටම ගැළපෙන සේ ඉතා ප්‍රභාශ්වර ලෙස එකිනෙකට වෙනස් සංකල්ප ගොඩනැගීමට ඇයට ඇත්තේ අපූරු හැකියාවකි. පර්යේෂණ මට්ටමින් තැනූ පිංචි අධ්‍යාපනික චිත්‍රපට දෙස් විදෙස් අධ්‍යාපනඥයින්ගේ හා මනෝ වෛද්‍යවරුන්ගේද විශේෂ පැසසුමට ලක්වූ අතර, එතුළින් දරුවන්ට ඉතා අසීරු අකුරු ඉගෙනුම් කටයුත්ත ඉතාම සාර්ථකව සිදුකෙරෙනු මනාව දැකගත හැක.
ළමා කාලය
පුහුල්වැල්ල නම් වූ සුන්දර ගම් පියසේ මිත්තණියගේ නිවසේ උපන් ඇය, තම කුඩා කාලයෙන් වැඩිකොටස දෙමව්පියන්ද සමඟ එහිම ගතකළාය. කඳු මුදුනක පිහිටි නිවස, මල් පලතුරු පිරි වතුයාය, එපිටින් ගලා හැලූණු පුහුල් ඇල්ල, කුඹුරු යාය සහ දොළපාර, ඇයට සුරංගනා ලෝකයක් මවාලීය. “ඒ කාලෙ මට හිතුණෙ ඒ තමයි ලෝකෙ ලස්සනම තැන කියලා” ඇය කියයි.
සොයුරන් දෙදෙනෙකු අතර පවුලේ එකම දියණිය ලෙස හැදුණු වැඩුණු ඇයට, සොයුරන් මෙන් බෝලගැසීම ගස්නැගීම වැනි සෙල්ලම්වලට එතරම් උනන්දුවක් නොවීය. බෝනික්කන් සෙල්ලම් කිරීමට වෙන ගැහැණු ළමයෙකුද නොවූ හෙයින්, ඇය කුරුල්ලන්, සමනලයින්, දඩුලේනුන්, වත්ත පහළට එන මොණරුන් හා ගසින් ගසට පැන යන වඳුරු රංචු පසුපස යමින්, අවට පරිසරය නිරීක්ෂණය කිරීමට වැඩි කැමැත්තක් දැක්වූවාය. වත්තෙන් පිටට යාමටද අවසරයක් නොතිබුණු බැවින් ඇය වත්ත පුරා යමින්, සොබාදහමේ සියුම් රිද්මයන්, වර්ණයන් හා වෙනස්කම් ඉතා ආශාවෙන් නිරීක්ෂණය කළාය. සමහර විට ඇයද කුඩා සමනලයෙකු මෙන් ඔවුන් පිටුපස සැඟවී සිටි අතර, විටෙක කුඩා පරීක්ෂකයෙකු මෙන් සතුන්ගේ හඩ, වර්ණ, පියාපත් හා චර්යා රටාවන් අධ්‍යයන කළාය. සොබාදහමට බෙහෙවින් ආදරය කළ ඇය විටෙක නිවස පසුපස කඳු බෑවුමේ ඇති ගල් පඩිපෙළ මත ඉඳගෙන, කුඹුරු යාය, දොළ හා දිය ඇල්ල දෙස බලා ඉඳිමින්, ගී පද කතන්දර සෙමින් මිමිණුවාය. එපමණක් නොව පොත් පුරා, පිටු පුරා, කවි ගී කතන්දර ලියා, සමනලූන්ට, කුරුල්ලන්ට ඇසෙන සේ ඒවා කියවා, සුළගේ යැව්වාය. බිත්ති පුරා කුරුටු සිතුවම් ඇඳ විටෙක බැණුම්ද ඇසුවාය. කතන්දර කියවීමටද ඉතා ආශා කළ ඇය තාත්තා ගෙනැත් දුන් කතන්දර පොත් එක හුස්මට කියෙව්වාය. සමහර චීන හා රුසියානු සුරංගනා කතා කටපාඩම් වනතුරුම කියෙව්වාය. සීයා ඇයට ඉතිහාස කතාද කියාදුන්නේය. ඇය ඒවා විචිත්‍රවත් ලෙස සිතේ මවාගත්තාය. මිදුල පුරා, බිත්ති පුරා ඇද හැඩ බැලූවාය.
ප්‍රාථමික ගුරුතුමියක් වූ මිත්තණිය, ඇගේ විවිධ කලා හැකියාවන් හා උනන්දුව මුලසිටම සතුටින් නිරීක්ෂණය කළ නමුත්, එය ඇගේ අධ්‍යාපන කටයුතුවලට බාධාවක් වෙතැයි සිතා වැඩිදුර උනන්දු නොකළාය. අධ්‍යාපනයට මිස කලා කටයුතුවලට පවුලේද කිසිදු නැඹුරුවක් නොවූ අතර, අම්මා තාත්තා ඇතුළු සියලූ දෙනාම ඇගේ දස්කම් බලා බොහෝ සතුටට පත්වූ නමුත් ඇය කවදා හෝ සම්මානනීය නිර්මාණකරුවෙකු වනු ඇතැයි කිසිවිටෙකත් අනුමාන කළේ නැත.
අධ්‍යාපනය
බහතෝරන වියේදීම නිවසේ තිබුණු පොත්පත් සහ පුවත්පත් පිටු පෙරළමින්, ඇගේම භාෂාවකින් කියවන අයුරු දුටු මිත්තණිය, වයස අවුරුදු 2 ක් වීමටත් පෙර ඇයට අකුරු කියා දුන්නාය. යන්තම් ඇවිදින කල සිට මිත්තණියගේ අත එල්ලී පාසල් යාමටද ආශාකළාය. මූලික අධ්‍යාපනය පාසල් කිහිපයකම ලැබු ඇය, 5 වසර ශිෂ්‍යත්ව විභාගයෙන් ඉහළ ළකුණු ලබා විශාඛා විද්‍යාලයට ඇතුළත් වූවාය. ඇය දිගින් දිගටම සාහිත්‍ය හා චිත්‍ර කලාවේ නිරත වූ නමුත් සමීපතම මිතුරියන් හැර ඇගේ දක්ෂතා ගැන බොහෝ දෙනෙක් දැන සිටියේ නැත. පාසල් වියේදී දෙමව්පියන් විසින් ඇගේ ආශාවට පොත් කිහිපයක් මුද්‍රණය කර දුන් නමුත්, පාසැලේදී නිහඩ ලැජ්ජාශීලී සිසුවියක් වූ ඇය කිසි විටෙකත් ඇගේ නිර්මාණ ගැන කතා කළේද නැත. ඒවා වටින්නේ යැයි ඈ සිතුවේද නැත.
වෘත්තීය අධ්‍යාපනය
උසස් පෙළින් පසු බැංකුවෘත්තිය තෝරාගත් ඇය, ආර්ථික විද්‍යාව, කළමනාකරණය, ගණකාධිකරණය, නීතිය, ආදී විෂයන් ඇතුළත් වූ වෘත්තීය බැංකු විභාග සියල්ල (AIB-Sri Lanka) සම්පූර්ණ කළාය. ඊට අමතරව මානව සම්පත් කළමනාකරණය පිළිබඳ උපාධියක්ද (BSc (Hons) in Human Resource Management), ව්‍යාපාර කළමනාකරණය පිළිබඳ පශ්චාත් උපාධියක්ද (MBA), වෘත්තීය ක්ෂේත්‍රයට අදාළව හිමිකරගත්තාය. ඉන්දියානු භරතනැටුම්ද ආශාවෙන් හැදෑරූ ඇය අරංගේත්‍රම් එළිදැක්මෙන් අනතුරුව භරතනාට්‍යම් විශාරදවරියක්ද (Visharad in Bharathanatyam) වූවාය. වෘත්තීය ක්ෂේත්‍රයන්ට අමතරව ඇය ගෘහ නිර්මාණ ශිල්පය, ළමා මනෝ විද්‍යාව, ළමා අධ්‍යාපන ක්‍රමශිල්ප, මනෝවිද්‍යා උපදේශනය, Neuro Linguistic Programming (NLP), සෞඛ්‍ය විද්‍යාව, පරිසර විද්‍යාව, ඉතිහාසය ආදී විෂයන් හැදැරීමද, සංගීතය, තෙල් සායම් චිත්‍ර, ලී කැටයම්, මෙන්ම සුප ශාස්ත්‍රය, මෝස්තර නිර්මාණය, ඇඳුම් මැසීම, ආදී ගෘහස්ථ කලාවන්ද ඇගේ පි‍්‍රයතම විනෝදාංශ අතර විය.
-ජ්‍යෙෂ්ඨ මහාචාර්ය කුසුමා කරුණාරත්න මහත්මියගේ ලිපියක් ඇසුරිණි
ජානකී සූරියආරච්චි විසින් මෙතෙක් රචනා කර ඇති පොත්
1- රංගීගේ චිත්‍රය
2- සඳීගේ සිහිනය
3- අපි දෙන්නා
4- චූටි මල්ලියා
5- චණ්ඩි උඩගිය හැටි
6- හඳහාවා මගේ අතේ
7- කූඹි බබා
8- බුහුකි
9- චුට්ටං බට්ටිච්චා
10- සරුංගල් බිංදු
11- තණකොළ පෙත්තා
12- ලේන් අප්පු
13- පූස් පැටියා සහ බටුමීයා
14- ඉත්තෑ පුංචා
15- සමදරා
16- බූලා
17- බඩ ඌයියා
18- කුරුලු දුපත
19- පුල්ලි පුල්ලි පුල්ලියා
20- අලිබබා
21- බුකුං බුකුං
22- රතූ
23- රිලා මොටා
24- බක බක නයිදේ
25- කොහොල්ලෑ නරිහාමි
26- අලි හොඩවැල
27- දළඹු පැංචා
28- රතුදිමියා
29- මගේ ගී පොත
30- කිරි පැංචා
31- බනිස් ගෙඩිය
32- අලුත් කුඩේ
33- යාළු මාළු
34- දුවන සපත්තුව
35- පඹරාල
36- කොණ්ඩ කැවුම
37- නැතිවුණු කුඩේ
38- චූටිට මාළු
39- කවුද හොරා
40- තනිහාවා
41- පුංචි සුරංගනාවි
42- සුළං බංචි
43- ඇවිදින පහන
44- තිත් මුවපැටියා
45- නපුරු ඩිංගිරි
46- බූ බබා
47- වලස් පුංචා
48- කපුටු කාක්
49- කිරා
50- බකමූණෝ හ්ම් හ්ම්
51- හිච්චි
52- මී යාළුවෝ
53- කෑරලා සහ කෝකිලයා
54- අවුරුදු කුමාරි
55- තනියා
56- බත් ඇටයේ කතාව
57- නපුරු මන්තරකාරි
58- ගොළුබෙලි කට්ටා
59- ඩුං ඩුං ඩුං
60- සිලිටිගෙ නැට්ට
61- දඟයා
62- ඉගිලෙන තරුව
63- කැරකෙන ගෙදර
64- කුකුල් රජ්ජුරුවෝ
65- මල් කුමාරි
66- නැට්ටුක්කාරි
67- හිකි බක බක
68- බොරුකකුල් කාරයා
69- දේදුනු කුමාරි
70- කැවුම් හොරා
71- කූඹි කෝච්චිය
72- කිඹුල් මනමාලි
73- පැණි වළලු
74- සමනල් ගී
75- බැලුම් හොරා
76- සුදුපූසියි සුදුචූටියි
77- මමයි බබා
78- කිඳුරු කුමාරි
79- දඟමල්ලෝ
80- අපි දෙන්නා යාළුෑ
81- බෑ කියලා බෑ බෑ බෑ
82- බිංකා
83- කිරිදත කෝ
84- වවුල් කැලේ
85- රැවටිච්චී පොල්කිච්චී
86- පියාඹන පීරිසිය
87- අත්තම්මගෙ කළු හවරිය
88- මද්දු
89- හිනාපාන්
90- හොරකිටියා
91- කූඹිත්තයි කූඹිත්තියි
92- හා හා හරි හඳහාමි
93- රැවුල් කන්ද
94- හා හොරේ
95- ඕළුමලී
96- මුතුකුමාරි
97- පුංචි සමනලී
98- යකා පැංචා
99- මදුරු චූටි
100- කුස්සියෙ හොල්මන්
101- කිඹුල් මල්ලි
102- මී දඩයම
103- රාස්ස කැලේ
104- අඩන්නෙ ඇයි මගෙ සුදු අම්මා
105- කෝ මගෙ බිත්තරේ
106- කවුද මට ආදරේ
107- බඩ කුරු කුරු
108- කෝ හඳමාමා
109- හංගමු රසකෑම
110- ඉරමාමා යන්න ගිහින්
111- බබා ලෙඩවෙලා
112- වෙලාවකට හරි හොඳයි
113- අමුතු පඳුර
114- කවුද දිනුම්
115- අඬන බබා
116- කේන්ති කීයද?
117- අරුන්දතී
118- සිනාමලී
119- ට්වික්ලින්කා
120- එන්න යන්න හඳ බලන්න
121- මල් කැකුල
122- සල්මලී
123- පළිඟු වළල්ල
124- අප්පච්චී
125- බූල් බූල්
126- හොල්මන් පැංචා
127- ඉක්කයි මමයි
128- වැහිළිහිණි පැටියා
129- පිටසක්වල කුමාරයා
130- චන්දු තමී
131- අළු පූසිගෙ පුංචි පැටව්
132- බයගුල්ලෝ
133- හපනි
134- කැලේට හොරු පැනලා
135- කැවුම් කැවුම්
136- කිඳුරු දුපත
137- රංකිරි නංගි කෝ
138- සමනලීගෙ මල්ගවුම
139- සතුටු ගෙදර
140- යෝධ කතන්දර පොත
141- මං ඉපදුණු දා
142- නිදිකුමාරි
143- රසුමන්දි
144- අච්චාරු හෝටලේ
145- බුන්ටු
146- දොයි අම්මා
147- නෙළුම් මලයි සමනලයයි
148- පිනිකුමාරි අඩනවා
149- මම ආසම පාට
150- සමනල මල
151- සරුංගලේ හොරු අරන්
152- මං ආසයි අම්මා වෙන්න
153- ටක ටක ටක ටක
154- මමත් යනවා ඉස්කෝලේ
155- හීනලන්තය
156- චූටිගෙ සාප්පු සවාරිය
157- ලොකු වුණාම මං
158- අහිංසක පඹරාල
159- බිම්බුගෙ කතාව
160- මටත් ඉන්නවා නංගි බබෙක්
161- අකුරු කෝච්චිය
162- මල්මී
163- සිටු කුමාරයෝ තුන්දෙනා
164- ටිකිරි ගී
165- වලාකුළෙන් ඇවිත්
166- කාගෙද ඒ කට
167- පැස්තුඩු යානාව
168- අප්පිච්චා
169- අද නම් හරි නරක දවසක්
170- හීන කෝච්චිය
171- චූටික්කා පුතා කෝ
172- කෑම සූත්තරේ
173- අත්තම්මගෙ උපන්දිනේ
174- අතේ හුරුව
175- රූප අඳිමු අත හුරුවෙමු
176- බව්වා මගේ රොකී
177- සුළං අරන් ගිය අත්තටුව
178- විකුම්ගේ ලෝකය
179- සල්ලි ගහේ කතාව
180- චොකෝ කුමාරි
181- Hide & Seek
182- The Giant Mushroom
183- My Bodyguard
184- Hop Jo Jo
185- Never Again
186- It’s a Wonder
187- The Dancing Fish
188- The Invisible Hat
189- The Flying Train
190- Silky
191- Bumpi
192- Buzzy & Jessy
193- Mermellissa
194- Buhuki (English)
195- The Magic Soup
196- Emirosy
197- Finbo
198- Chickery Chick
199- BacDonald
200- Daffodeelia
201- The Witch’s Daughter
202- Candleena
203- Who’s the prettiest
204- Chweechy chweechy Cho
205- It’s Amma’s birthday tomorrow
206- Twinklinka (English)
207- Jingbu- The big bully
208- The Ugly Princess
209- Lolly
210- Queen Ozorozca
211- Hello Bird! Hello Bird!
212- Sem Musuru (Tamil)
213- Chandu-Thamee (Tamil)
බාහිර යොමු
[සංස්කරණය]https://www.facebook.com/JanakiSooriyarachchi/photos_albums
https://www.facebook.com/JanakiSooriyarachchi/videos/10154464176119625
https://www.youtube.com/@TikiriAnimations/videos
https://tikiri.com/about-the-author/?fbclid=IwAR0xZ_Bz8dEQiqgiO_xA5_pyWGvYY_appEb5muld2GwUzQ3_1nQlkCz8anc සංරක්ෂණය කළ පිටපත 2023-01-01 at the Wayback Machine
https://tikiri.com/product-category/all-books/ සංරක්ෂණය කළ පිටපත 2023-01-01 at the Wayback Machine
http://www.lankadeepa.lk/latest_news/%E0%B7%85%E0%B6%B8%E0%B7%8F-%E0%B6%B4%E0%B6%BB%E0%B6%B4%E0%B7%94%E0%B6%BB-%E0%B6%85%E0%B6%AD%E0%B6%BB-%E0%B6%85%E0%B6%AD%E0%B7%92%E0%B7%81%E0%B6%BA-%E0%B6%A2%E0%B6%B1%E0%B6%B4%E0%B7%8A%E2%80%8D%E0%B6%BB%E0%B7%92%E0%B6%BA-%E0%B6%A2%E0%B7%8F%E0%B6%B1%E0%B6%9A%E0%B7%93-%E0%B7%83%E0%B7%96%E0%B6%BB%E0%B7%92%E0%B6%BA%E0%B7%8F%E0%B6%BB%E0%B6%A0%E0%B7%8A%E0%B6%A0%E0%B7%92/1-458337උපුටාදැක්වීම් දෝෂය: <ref> ටැගය සොයාගත නොහැකි බැවින් </ref> වසා දමමින්</ref></ref>