ග්යොංචොන්සා ස්තූපය

විකිපීඩියා වෙතින්
(ග්යොංචොන්සා පැගෝඩා වෙතින් යළි-යොමු කරන ලදි)
ග්යොංචොන්සා ස්තූපය
කොරියාවේ ජාතික කෞතුකාගාරයේ පළමු මහලේ ග්යොංචොන්සා ස්තූපය පිහිටුවා ඇත.
කොරියානු නම
හංගුල්경천사십층석탑
හන්ජා十\plain
ප්‍රතිශෝධිත රෝමානුකරණයGyeongcheonsa sipcheung seoktap
මැකූන්–‍රයිෂවර්Kyŏngch'ŏnsa sipch'ŭng sŏkt'ap

ග්යොංචොන්සා ස්තූපය යනුවෙන් හැඳින්වෙන්නේ කොරියාවේ අං. 82වන ජාතික වස්තුවයි. 1962 දෙසැම්බර් 20 දින දකුණු කොරියානු රජය විසින් එය ජාතික වස්තුවක් ලෙස නම් කරන ලදී. [1]

ස්තූපයේ පළමු මහලේ ඇති ශිලා ලේඛනයෙහි සඳහන් වන්නේ මෙම ස්තූපය ඉදිකරන ලද්දේ 1348දී, එනම් ගොර්යෝහි චුංමොක් රජුගේ සිව්වන වර්ෂයේ බවයි. මෙම ස්තූපය මුලින් පිහිටුවා තිබුණේ වර්තමාන ග්යොංගි-දෝ පළාතේ ගේපුං-ගුන්හි, ග්වංදොක්-මියොන් ප්‍රදේශයේ බුසෝ කන්ද පාමුල පිහිටා තිබූ ග්යොං‍‍චොන්සා විහාරයේ ය. නමුත් මෙම විහාරය වර්තමානයේ දක්නට නොලැබේ. ජපානය විසින් කොරියාව යටත් කරගෙන තිබූ සමයේ මෙම ස්තූපය ජපානය වෙත රැගෙන යන ලදී. නමුත් 1960දී එය නැවත කොරියාව වෙත රැගෙන ආ අතර, ග්යොංබොක්ගුං මාලිග භූමියේ එය ස්ථාපනය කරන ලදී. වර්තමානය වන විට, ස්තූපය කොරියාවේ ජාතික කෞතුකාගාරයේ ප්‍රධාන ශාලාවලින් එකක තැන්පත් කොට ප්‍රදර්ශනයට තබා ඇත.

තොරතුරු[සංස්කරණය]

මෙම ස්තූපය මීටර 13ක උසින් යුක්ත ය. එය මහල් දහයකින් සමන්විත ය. කෙසේනමුත්, ස්තර තුනකින් සමන්විත අත්තිවාරම හේතුවෙන් මෙම ස්තූපය සතුව මහල් දහතුනක් ඇතැයි බොහෝ විට වරදවා වටහාගනු ලැබෙයි. ගොර්යෝ යුගයේ බොහෝ ස්තූප මෙන් නොව මෙම ස්තූපය නිර්මාණය කොට ඇත්තේ කිරුගරුඬවලිනි. සාමාන්‍යයෙන් එකල කොරියානු ප්‍රතිමා ශිල්පීන් ප්‍රතිමාකරණයේ නියැළෙන්නට ප්‍රිය කළේ ග්‍රැනයිට් මාධ්‍යයෙනි. පසුකාලීනව ජොසොන් රාජවංශ යුගයේ ඉදිවූ වොන්ගක්සා ස්තූපය ශෛලිය අතින් මෙම ස්තූපයට බෙහෙවින් සමාන ය. මේ නිසා එම ස්තූපය නිර්මාණය කෙරෙහි ග්යොංචොන්සා ස්තූපයේ ආභාසය බෙහෙවින් බලපාන්නට ඇතැයි විශ්වාස කෙරේ.

ග්යොංචොන්සා ස්තූපය පිහිටා ඇත්තේ ස්තර තුනකින් යුත් වේදිකාවක් මත ය. මෙය කුරුසියක ආකාරයෙන් සතර දිශාවන්ට නෙරා ඇත. ස්තූපයේ පළමු මහල් තුන අත්තිවාරමේ (වේදිකාවේ) හැඩයට සමාන හැඩයකින් යුක්ත ය. මෙම ස්තර තුනකින් යුත් අත්තිවාරමේ සෑම පනේලයක්ම බුද්ධ රූප, බෝධිසත්ත්ව රූප, පුෂ්ප සහ ලියකම් කැටයම්වලින් අලංකාර කොට ඇත.

සෙසු මහල් සමචතුරස්‍රාකාර හැඩයෙන් යුක්ත වන අතර, සංකීර්ණ කැටයම්වලින් සමන්විත ය. මේ නිසා මෙම කිරිගරුඬ ස්තූපය දැවයෙන් නිමවූවක් මෙන් පෙනේ. සෙසු මහල් ගරාදි වැටවල්, වක්වූ දෙපළ වහලවලින්, පියසි කෙළවරවල්වලින් යුක්ත බව සහ සෑම පියස්සක්ම උළු අතුරා ඇති බව පෙන්වීමට කැටයම් කොට තිබේ.[2][3]

මෙම ස්තූපය අතිශයින් වටිනා නිර්මාණයක් ලෙස සැලකෙන්නේ එමගින් වර්තමානය වන විට බොහෝ සෙයින් දක්නට නොමැති ගොර්යෝ යුගයේ දැවමය ගෘහනිර්මාණ ශෛලිය නිරූපණය කරන හෙයිනි. දකුණු කොරියානු සංස්කෘතික උරුම පරිපාලනය අනුව මෙම ස්තූපය කොරියානු ශෛලමය නිමැවුම් අතර විශිෂ්ටතම නිදසුනක් වන අතර, ඉහළ කලාත්මක වටිනාකමකින් යුක්ත ය.

ගැලරිය[සංස්කරණය]

මේවාත් බලන්න[සංස්කරණය]

ආශ්‍රේයයන්[සංස්කරණය]

  1. "Heritage classification". Cultural Heritage Administration.
  2. සංරක්ෂිත පිටපත, http://english.tour2korea.com/enu/CU/CU_EN_8_3_2_1.jsp, ප්‍රතිෂ්ඨාපනය 2017-11-09 
  3. http://www.buddhism.org/board/read.cgi?board=glossary&y_number=41&nnew=1

බාහිර සබැඳි[සංස්කරණය]

"https://si.wikipedia.org/w/index.php?title=ග්යොංචොන්සා_ස්තූපය&oldid=591897" වෙතින් සම්ප්‍රවේශනය කෙරිණි